Pinerluuteqarsimasunut inissiisarfimmi nakkutilliisunut 38,4 millionit koruunit
Nunatsinni pinerluuteqarsimasunut inissiisarfimmi nakkutilliisut akissarsiagissaaarnerusussanngorput.
Nunatsinni nunaqavissut inissiisarfinni sulisut akissarsiaasa qaffannissaannut ukiunut sisamanut 38,4 millionit koruunit atorneqarnissaat danskit naalakkersuisuisa Siumumit Inuit Ataqatigiinniillu folketingimut ilaasortanut isumaqatigiissutigaat.
38,4 mio. koruunit ukiut tamaasa 2020-mit 2023-mut 9,6 mio. koruuninut agguataarneqarput
Isumaqatigiissut naapertorlugu aningaasani taakkunani nunatsinni pinerluuteqarsimasunut inissiisarfinni nakkutilliisut pillugit isumaqatigiinniarnissamut akiligassat ilanngunneqanngillat
Tusarfik: Inatsiseqarnermut ministereqarfik, Siumut aamma Inuit Ataqatigiit
Akissarsiaasa qaffaataa ukioq manna januaarimit atuutissaaq - tassalu kingumoortumik atuutilissalluni.
Akissarsiaallu Danmarkimi illoqarfiit pingaarnersaanni parnaarussivinni sulisut akissarsiaasa naligilissagaat qulakkeerneqassalluni.
Pinerluuteqarsimasunullu inissiisarfinni nakkutilliisut ataasiakkaat akissarsiaat qanorpiaq qaffanneqartigissanersut peqatigiiffiit maanna isumaqatigiinniutigisussanngorpaat.
10,8 millionit koruunit politiit aningaasarsiaannut sinneruuttut
Pinerluuteqarsimasunut inisissiisarfinni nakkutilliisunut aningaasanit Folketingip 2019-imi ukiakkut ataatsimiinnermini 2020-mut aningaasanut inatsimmit 49,2 millionit koruuninit immikkoortitaanit psuupput. Aningaasat immikkoortitat nunatsinni pinerluuteqarsimasunut inissiisarfinni nakkutilliisut politiillu akissarsiaasa qaffaanissamut atorneqartussanngorlugit aalajangerpaat.
Tamanna inatsiseqarnermut ministereqarfiup kalaallit danskillu pinerluuteqarsimasunut inissiisarfinni parnaarussivinnilu nakkutilliisut akissarsiaannik sulinermilu atugassarititaannik sanilliussilluni nalunaajaanerata piffissami sivisuumi utaqqineqartup siorna ukiakkut saqqummersinneqarnerata kingorna aalajangerneqarpoq.
AAMMA ATUARUK 49,2 millionit koruunit nunatsinni inatsiseqarnermut susassaqarfimmut immikkoortinneqartut
Nalunaajaanermi tassani pingaartumik nunatsinni pinerluuteqarsimasunut inissiisarfimmi nakkutilliisut danskinit suleqatiminnit akissarsiakinnerungaatsiartut erseqqissaatigineqarpoq.
Akissarsiaqarnikkut assigiinngittoqarnera nalunaajaasoqannginneraniillu nunatsinni politiit peqatigiiffiannit, parnaarussiviit kattuffiannit Naalakkersuisuusarsimasuniillu isornartorsiorneqangaatsiartarsimavoq, naalagaaffeqatigiinnimi naalagaaffiup ataani atorfeqartut tamarmik danskit naalagaaffiat sulisitsisoraat.
AAMMA ATUARUK Akissarsiat assiginnginnerat pillugu ministereqarfik suli akinngilaq
Pinerluuteqarsimasunut inissiisarfimmi nakkutilliisunut isumaqatigiissuteqarnermit politiit akissarsiaannik qaffaanissamut 10,8 millionit koruunit sinnerupput.
Qaquguli isumaqatigiissuteqartoqassanersut suli nalunarpoq. Siumumit Inuit Ataqatigiinniillu Folketingimut ilaasortat tassunga tunngatillugu suli sumaqatigiissuteqarsinnaasimanngillat.