Akissarsiat assiginnginnerat pillugu ministereqarfik suli akinngilaq

Parnaarusivinni paarsisut kattuffiata, Fængselsforbundetip Inatsisilerinut ministereqarfimmut saaffiginnissutaa sapaatit akunnerini arlalinni akineqarani, maanna ministereqarfik akissuteqarpoq, akissarsialli assigiinngissutai pillugit eqqaasaqartoqarani.
Nuummi pineqaatissinneqarsimasunut inissiisarfimmi sulisussaaleqineq kisimi atuutinngilaq. Aasianni Ilulissanilu aamma sulisussaaleqisoqarpoq. Arkivfoto.
Allattoq Jens Betak
oktobarip 31-at 2019 19:03
Nutserisoq Jens Thorin

Pineqaatissinneqarsimasunut Nuummi inissiisarfimmi sulisussaaleqinermi Danmarkimiit misilittagalinnik soraarninngornernillu aqqanilinnik ikiuukkiartortoqarnissaa, Danmarkimi Parnaarusivinni paarsisut kattuffiata, Fængselsforbundetip, aamma nunatsinni pineqaatissinneqarsimasunut inissiisarfinni paarsisut kattuffigisaata nuannaarutigaa.

Kattuffiummi nammineq tamanna aamma siunnersuutigaa, taamaattorli isornartoqartitsivoq

- Taamaaliorniarmata pitsaasutut isigaaarput. Tassami Nuummi sulisut naammanngillat. Taamaaliornerli ikuallannermik qamisaanerinnartut ippoq, tassami Danmarkimiit Kalaallit nunaannukartitsisarnissaq isumaanngilaq, pineqaatissinneqarsimasunulli Nuummi inissiisarfik Kalaallit Nunaanniit ingerlanneqartussaalluni, kattuffiup siulittaasua Bo Yde Jørgensen oqarpoq.

Taamaassappallu, nunatsinni Danmarkimilu pineqaatissinneqarsimasunik paarsisut aningaasarsiaasa assigiinnginnerat iliuuseqarfigineqartariaqartoq, Fængselsforbundet isumaqarpoq.

Kalaallit Nunaat pillugu ataatsimiititaliami oqaluuserineqassaaq

Inatsisilerinermulli ministereqarfik tamatumunnga suli iliuuseqanngilaq.

- Inatsisilerinermut ministereqarfik saaffiginnissutitsinnut akissuteqartinniarlugu suli iluatsitsinngilanga. sapaatit akunneri arfinillit arfineq marluk matuma siorna allagaqarpugut, akineqarnissatsinnillu tuavisaarinikuuvugut, aammali taanna suli akineqanngilaq. Tamannalu Kalaallit Nunaat pillugu ataatsimiititaliamik ataatsimeeqateqarutta erseqqilluinnartumik isornartorsiussavarput, siulittaasoq  Bo Yde Jørgensen oqarpoq.

Kattuffik Kalaallit Nunaat pillugu ataatsimiititaliamik novembarip arfernanni ataatsimeeqateqassaaq.

KNR-ip inatsisilerinermik ministereqarfik akissarsiat assigiinnginnerat pillugu saaffigimmagu, tassanngaanniit nalunaarusiortoqaleruttortoq akipput. paarnaarussanik paarsisut atugaat nalunaarusiami suli naammassinngitsumi suliarineqarput.

Nalunaarusiaq naammassitinnagu, inatsisilerinermut ministeri Nick Hækkerup allannguerusunngilaq.

Nalunaarusiaq ukioq naatinnagu naammassissangatinneqarpoq, kisianni siusinnerusukkut kinguartinneqartareerpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk