Nakorsatta peqatigiiffiat peqqissutsimik isumaqatigiissutitaaq pillugu: Pilersaarutit ajunngivipput
Peqqinnissaqarfik aningaasaliiffigineqarusalerli, nunap immikkoortuini napparsimmaviit tamarmik CT-scanneritaarlik Peqqinnissaqarfimmilu sulisooreersunik atorfinitsitsisoqarli.
Nunatsinni Nakorsat Peqatigiiffiata siulittaasorisimasaata, Hans Christian Florian Sørensenip, Inatsisartuni politikerit Peqqinnissaqarfiup isumaqatiginninniutigileruttornerani pingaarnertut kissaatai pingasut taakkuupput.
Peqqinnissamik tamatuma kingorna isumaqatigiissusiortoqareersorlu Nunatsinni Nakorsat Peqatigiiffiat nutaamik siulittaasortaarpoq, siulittaasunngortorlu tassaavoq Nuummi Dronning Ingridip Napparsimmaviata naartusunut ernisunullu immikkoortortaani nakorsaaneq Charlotte Mumm Ring.
Peqqissutsimillu isumaqatigiissutitaami pilersaarutit, taassuma peqatigiiffitsillu nuannaarutigaat.
- Isumaqatigiissutitaami pilersaarutit ataatsimut isigalugit ajorinngeqaagut, aamma politikerit suliaqarfinnut assigiinngitsorpassuarnut tunngasuni isumalioqqissaarluarsimarpasipput. Taamaammat isumaqatigiissutitaaq ataatsimut isigalugu naammagisimaaqaarput.
Peqqinnissaq pillugu Kattuffiit (PPK) isumaqatigiissutitaaq aamma naammagisimaaqaat. Soorlu peqqissaasut, qinnguartaasartut ernisussiortullu PPK-mi ilaasortanut ilaapput.
Peqqissutsimilli isumaqatigiissutitaami ukiorpaalunnut pilersaarutit aningaasaliinerusoqarsimannginnera, PPK-p siulittaasuata ugguutigaa. Taakkununnga aningaasaliissutissat aningaasanut inatsisissamik ukiut tamaasa isumaqatiginninniarnerni aaneqartassapput.
Tamannali ernummatigivallaanngikkitsik, Nunatsinni Nakorsat Peqatigiiffiata siulittaasua Charlotte Mumm Ring oqarpoq. Politikerimmi peqqissutsimik isumaqatigiissutitaami pilersaarutinik naammassinninnissaat naatsorsuutigigini, taanna oqarpoq.
Ataatsimik CT-scanneritaarneq aallartinissaataasoq
Nunap immikkoortuini napparsimmaviit tamarmik aningaasaliiffigineqarnerunissaat nutaanillu atortorissaasersorneqarnissaat, Nunatsinni Nakorsat Peqatigiiffiata kissaatigilluinnagaasa ilagaat.
Nuup avataani napparsimmaviit nutaanik qinnguartaasersorneqarnissaat napparsimasunillu nutaanik angallassissusersorneqarnissaat, tassa ambulancersorneqarnissaat, pitsaanerusunik attaveqaasersorneqarnissaat najugaqarfinni nakorsaqanngitsuni qarasaasiakkut nakorsiaassisoqarnerusalernissaa pisariaqartoq, peqqissutsimik isumaqatigiissutitaami allaqqavoq. Ilulissani napparsimmaviup CT-scanneritaarnissaa aamma siunniunneqarpoq.
Nunap immikkoortuini napparsimmaviit tamarmik CT-scanneritaarnissaat Nunatsinni Nakorsat Peqatigiiffiata kissaatigigaluaraa ataatsimilli CT-scanneritaarneq allartinissaatitut isigigitsik, Charlotte Mumm Ring oqarpoq.
Læs også Sundhedskartellet: Ny aftale er fornuftig - men der mangler penge
- Ilulissani napparsimmavik salliuneqarpoq - aallartinissaatigineqarluni. Nunap immikkoortukkaarluta suliunnaariartorluta kivitseqatigiinnerulluta sulilernissarput isumatusaarnerusoq paasineqarleriartussasoq neriuutigiinnarsinnaavarput, Charlotte Mumm Ring KNR-imut oqarpoq.
CT-scanneri qinnguartaataavoq 3D-nik assiliartaliisartoq, uninngasorlu tinuneqarnersoq, saarngimigut naffakoqarnersoq taqqamigulluunniit milikartoorsimanersoq taassuminnga qinnguartarlugu assilineratigut misissorneqartarpoq. Nunatsinni ullutsinni uninngasut Nuummi Dronning Ingridip Napparsimmaviani taamaallaat qinnguartartillutik assilitissinnaapput. Tamannalu uninngasup sumik ajoquteqarneranik paasisaqarnissamut sivsuumik utaqqisariaqarnermik kinguneqarpoq.
Nunatsinni Nakorsat Peqatigiiffiat nunatsinni kræftertunut immikkut aningaasaliisarlersaarneq pillugu aamma oqaaseqarpoq. Charlotte Mumm Ringip politikerertavut kræftertunik nunatsinni katsorsaavittaarnissamik ukkassinerulernerat pillugu nersorpai, ilumulli Nuummi Ilulissanilu napparsimmaviit kræftimik eqqugaasimasortatsinnut katsorsaavinngortinneqarsinnaanissaat qularalugu.
