Nakorsatta siulittaasuat: Napparsimmaviit aningaasaliiffigineqarnerulik – ingammik sineriammiittut

Peqqinnissaqarfik aningaasaliiffigineqanerullunilu nakorsanik ikiortissarsiorneq eqaannerulersinneqarli.

Nunatsinni Nakorsat Peqatigiiffiata siulittaasuata, Hans Christian Florian Sørensenip, Peqqinnissaqarfimmut kissaatai taakkuupput.

Inatsisartuni partiit Peqqinnissaqarfik isumaqatiginninniutigileruttorpaat. Peqqinnissaqarfillu nunatta karsianiit aningaasaliiffigineruNunatta karsianit Peqqinnissaqarfimmut aningaasaliiffigineqarnerusalerpat ilorraap tungaanut aallarniutaassaasoq, Hans Christian Florian Sørensen isumaqarpoq.

- Peqqinnissaqarfeqarnerput akisusoq nassuerutigisariaqarput. Nunarput nunanut allanut saneqqersuukkaanni tamakkerluni ukiumut naammassisaata (BNP) ilaminiinnai Peqqinnissaqarfimmut atortarput. Tassa nunarput Peqqinnissaqarfimmut aningaasaliinikippallaarpoq, taanna oqarpoq. 

Nunatta tamakkerluni ukiumut naammassisamik (BNP) 10 procentingajalluinnai Peqqinnissaqarfimmut 2020-mi atorai, Peqqinnissammut ataatsimiititaliarsuup isumaliutissiissutaani erserpoq. Aningaasat taakku Norgemut, Sverigemut Danmarkimullu naleqqersuukkutta ikinnerumaarput.

Nuummiinnaanngitsoq

Hans Christian Florian Sørensen Peqqinnissaqarfimmi ukiuni 33-ni sulivoq. Ukiut taakkua amerlanerpaartaanni Tasiilamiippoq, nunap immikkoortuani maanna nakorsaalluni.

Peqqinnissaqarfik tusaamaneqarnermininngarnit ingerlalluarnerusorigaluarlugu tassani pitsanngorsaasoqartariaqartoq, taanna isumaqarpoq.

- Tusagassiutit saqqummiuttagaat illuinnarsiorpalaarpalukkajupput, massakkulli killiffimmininngarnit ingerlalluarnerungaatsiarnerusinnaagaluartoq miserratiginngilara, taanna oqarpoq.

Soorlu ilorliunerusuni napparsimmavimmi uninngasut ataatsimut katiteriarlugit illoqarfinni anginerni, ingammik Nuummi, napparsimmavinnut misissortikkiartortartut amerliartuinnartut, taanna isumaqarpoq. Taakkualu amerlavallaartut, Hans Christian Florian Sørensen oqarpoq. Nunatta inuisa affaat sinnerlugit nunatsinni illoqarfinni pingaarnersap avataani najugaqartuusut, taassuma ilanngullugu erseqqissaatigaa.

- Najugaqarfiit minnerit salliunneqartariaqarput. Taakkunanimi najugallit nakorsagassaaqisortaqaqaat, taanna oqarpoq.

Nunammi immikkoortuini napparsimmaviit peqqissaaviillu ilarpassui sulisussaalatsipput, inuiaqatigiinnilu ikiortariallit nakorsamit ikiorneqarsinnaanissamut tutsuiginninngitsortaqartput. 

- Nakorsiarnissamut sivisuumik utaqqisariaqartarunnaaqqullugu Peqqinnissaqarfiup sullissinerulertornerulernissaa attavigeriaannaanerulernissaalu  salliuttariaqaraluarput, Hans Christian Florian Sørensen oqarpoq.

Siunnersuut: Nunap immikkoortuini napparsimmaviit tamarmik CT-scannitaarlik

Kitaani nunap immikkoortuini napparsimmaviit tamarmik Tasiilamilu peqqissaavik CT-scanneritaarpata ilorraap tungaanut alloriarnissamut aaqqiissutissaqqinnerpaavoq.

CT-scanneri uninngasup timaanik qinnguartaalluni assiliissutaavoq. Uninngasoq taqqamigut milikartoorsimanersoq, tinuneqarnersoq, saarngimigut naffakoqarnersoq allarluinnarmilluunniit ajoquteqarnersoq naffakuunersoq qinnguartarlugu assilineratigut misissorneqartarpoq.

Nunatsinni ullutsinni uninngasut Nuummi Dronning Ingridip Napparsimmaviani taamaallaat qinnguartartillutik assilitissinnaapput. Nunalli immikkoortuini napparsimmavinni qinnguartaalluni assiliissutilinnut uninngasuni peruluttut nappaataat suussusersilertorneqarsinnaallutillu nakorsarneqalertorsinnaasarput. Nunallu immikkoortuini napparsimmaviit tamarmik qinnguartaalluni assiliissutitaarpata uninngasuni peruluttunik Nuummukartitsisoqakkajunnaassagaluarpoq. 

- Qinnguartaalluni assiliissutit ajornartorsiutinik tamanik aaqqiinavianngilaq. Ilorraalli tungaanut pinissamut iluaqutaangaatsiarsinnaallutillu uninngasut nappaataannik suussusersilertuutaasinnaassapput. Qinnguartartillutik assilitereeraangamik allami misissoqqissaarneqarnissamut eqqortumillu nakorsarneqarnissamut immaqa innersuunneqartalissagaluarput, Hans Christian Florian Sørensen oqarpoq.

Nunap immikkoortuini napparsimmaviit naartusunut nipit maligaasat atorlugit, tassa ultralydimik, 1990-ikkunni misissuutitaarput, taassuma assersuutigaa. Naartusut naarmiorisaallu nakorsanit taamanikkut misissugasuarneqartalermata isumannaannerungaatsialersarput.

- Taamanikkut nikeriarnerujussuuvoq, nutaaliornipilussuullunili, aamma ukiorpassuarni iluaqutigeqaavut. Maanna alloriaqqiffissanngorpoq, tassa sineriammi napparsimmaviit qinnguartaalluni assiliissutitaartariaqarput, nakorsatta siulittaasuat oqarpoq.

'Peqqissaasut piukkunnaqisut soraartarput'

Peqqinnissaqarfiup ilungersualeruttortup, ingammik sineriammi nunap immikkoortuini napparsimmavinnut, sulisussarsiniartarnera atornittussarsiniartarneralu ajornakusooqaaq. 

Kalaallit peqqissaasut piukkunnaqisut napparsimasunik isumaginnikkunnaarlutik Peqqinnissaqarfimmi allaffissornermik suliaqalersimasortaqartut, Hans Christian Florian Sørensen oqarpoq. Aamma napparsimasunik isumaginninnermik sapiunnertik peqqutigalugu peqqissaasutut suliunnaartarput.

Peqqinnissaqarfilli aningaasaliiffigineqarnerusalerpat sineriammilu napparsimmaviit atortorissaarutitaarpata, pissutsit allanngussaqisut, taanna isumaqarpoq.

- Sulinermi atukkat sumiiffinni taakkunani tamani pitsanngorsarneqarpata qularinngilara suliamik nuannarinnittut atorfinittullu amerlissasut, Hans Christian Florian Sørensen oqarpoq.

Danmarkimit peqqinnissamut ikioqqunerusariaqartugut, Inatsisartuni partiit amerlanerussuteqartut Folketingimut 2022-mi qineqqusaarutigaat.

Danmarkimilli peqqinnissamut tunngasuni suleqateqarnerput allanngornani Namminersorlutik Oqartussalli qanoq iliuuseqarnerusariaqartoq, Nunatsinni Nakorsat Peqatifiiffiata siulittaasuat isumaqarpoq. 

- Imaanngilaq ilungersualaaratta akisussaaffik allamut tunniutiinnapajussagipput. Taamaaliornata akileraarnerusalersinnaavugut allatulluunniit iliorsinnaavugut, Hans Christian Florian Sørensen oqarpoq.