Sapaatip-akunnerata naanerani Qasigiannguani Siumut ataatsimeersualerpat imaannaanngitsumik pissaaneqarniuttussanngorput, partiimimi siulittaasussamik aamma qinersisoqartussaavoq.

Siuttunngorumallutik sassartuusut assigiinngilluinnartuupput aammalu partiiminnut assigiinngitsunik toraagaqarniarput, ataatsimilli assigiissuteqarput, tassalu: Kalaallit Nunaata siusinnerusumi kingusinnerusumiluunniit namminiilivikkumaarnissaa pillugu isumaqatigiissuteqarput.

Namminersornerullutik Oqartussani siornatigut qullersatut atorfilittaasimasoq Kaj Kleist naapertorlugu partii Siumut ajornartorsiuteqarpoq – taamatuttaaq siuttunngorniartuni, - namminiilivinnissaq oqallisigiuarpaat tamarmik, tigussaasumilli pilersaaruteqanngillat, taanna oqarpoq.

- Siuttunngorumallutik sassartut aamma taamaapput. Qanorluunniimmi pigaluarutta namminiilivinnissaq pillugu oqalunneq qulequtarujussuuvoq, tamatumalu piviusunngortinnissaata tungaanut iternga tikillugu oqallisigineqarluartussaaniaraluarpoq, Kaj Kleist oqarpoq.

Namminiilivinnissaq Siumumi initoqaaq

Siumup iluani ukiorpassuit ingerlanerini namminiilivinnissamut apeqqut initusarsimaqaaq – pingaartumillu ukiuni kingullerni qaaginnaanut killilluni oqallittoqartarpoq qulequtarlu assut inittoraluttuinnartutut illuni.

Taamaattumillu imminut assortuunneq atuuppoq, oqallinnermimi piviusorsiortumik siunnersuuteqartoqanngilaq.

Tigussaasumilli oqaluttuni tassaaneruvoq Aki-Mathilda Høegh-Damip 2030-p nallerpallaannginnerani namminiilivinnissamik oqaaseqartarnera, Kaj Kleist oqarpoq.

- Taannatuaavormi ulluleereersoq, Kim Kielsen Erik Jensenilu ulluliinikuunngillat oqarnikuullutilli Kalaallit Nunaat piareerpat namminiilivikkumaartugut. Taamaattumik siuttunngorniarluni oqallinnermi tamanna qanorpiaq pineqarniarnersoq qaqinneqassaqqooqaaq.

Aki-Mathilda tamanna pillugu oqaasissaqartaqaaq, Kaj Kleist oqarpoq. Taamaattumik nalorninarsinnaavoq aamma taanna eqqarsaataannarmut killiinnarnani aamma iliuuseqarsinnaassanersoq – aammami Inatsisartuni qinikkatut misilittagaqanngilaq.

- Aalajangersimasuuvoq, nunatsinnut partiiminullu ineriartortitserusuttorujussuuvoq, 2030-lu nallertinnagu namminiilivinnissap angunissaa pilersaarutigaa, taamatulli oqarneq assorujussuaq oqarluartaaneruvoq uangalu tamanna eqqarsarnartoqartittaqaara, taanna oqarpoq.

Aningaasalersornissamut tunngasut pilersaarut amigaataavoq

Partiili pilersaaruteqanngitsoq tappiitsutulli ililluni sattakkuni namminiilivinnissaq takujuminaatsorujussuussaaq. Pingaartumik illersornissamut aningaasaqarnermullu tunngasunik pilersaaruteqanngikkuni Danmarkimullu atajunnaarnissaa taamaatsillugu ernumanarpoq, Kaj Kleist oqarpoq:

- Ilami aningaasaqarnermulluunniit tunngasortaanik pilersaarutinik oqallittoqarnikuunngilaq, taanna erseqqissaavoq nangipporlu:

Kalaallit Nunaata nammineq napatittussaaneranik eqqarsartut assoralisimaassaqaat, taamatullu eqqarsartut amerliartuinnarput.

- Innuttaasut namminiilivikkusuttorpassuupput, tamatuma tungaanut nikittoqarnissaa pineruaat piviusunngortinnissaaninngarnit. Massakkorpiarlu killiffimmi aningaasaqarnermulluunniit tunngasortai ineriartorfiunikuunngillat, taamaattumik ukiut arfineq-marluk ingerlanerinnaani namminiilivinnerup piviusunngornissaa takorlooruminaappoq, Kaj Kleist oqarpoq.

Partiillu tamarmik aningaasalersornissamut eqqarsanngittuartillugit pilersaarusiortoqarsinnaanngisaannassaaq taamaalillunilu aamma namminiilivinnissaq anguneqarsinnaanaviarani.

- Aningaasaqarnissamut anguniagassat unammillernarnerpaasussaapput, pilersaaruteqanngittuartillutalu Kalaallit Nunaata namminiilivinnissaa qularnarluinnarpoq, taanna oqarpoq.