Siumumi immikkoortortaqarfiit: Namminiilivinnissaq tuaviuunneqassanngilaq
Siumukkormiut kimik siulersorneqarnissamik taasinissaanut aalajangerfissaq qanillivoq.
Siulittaasumut maannamut qinigassanngortittut tassaapput maanna siulittaasuusoq Erik Jensen, Folketingimi ilaasortaq Aki-Matilda Høegh-Dam aamma 2014-imiit 2020-mut siulittaasuusoq Kim Kielsen.
Siulittaasumut sassartuni pingasuusuni Aki-Matilda Høegh-Dam naalagaaffinngulertornissamut ersarissumik kissaateqartuuvoq.
KNR-imut qanittukkut ima oqarpoq:
- Namminiilivinnissamut isumaqatigiinniarnerit maannangaaq aallartittariaqarpagut. Danskit ministeriunerat isumaqatigiinniarnissamut erngertumik aaggersarneqartariaqarpoq.
KNR-ip Siumumi immikkoortortaqarfinneersut siulittaasussaminnik sapaatip akunnerata naanerani qinersisussat oqaloqatigaat.
Tamassumalu ersersippaa pilertortumik namminiilivinnissaq nangaassutigineqartoq.
Tassunngalu apeqqummut Kim Kielsen, Erik Jensenilu isumaqatigineqarnerupput Aki-Matilda Høegh-Damip Danmarkimit avissaalertorrusunneraninngaanniit.
Siumut Qaqortoq:
Siumut Qaqortumi siulittaasoq Karlina Lundblad isumaqarpoq peqqinnissaqarfimmi ajornartorsiutit inunnillu sullissinermi pissutsit aaqqeqqaarlugit namminiilivinissaq aatsaat anguneqartariaqartoq.
- Namminersulivinnissamut aqqut ingerlassaaq suut tamaasa nunatsinni ajunngitsumik ingerlanissaq pereerpat. Karlina Lundblad oqarpoq.
Siumut Narsaq:
Siumut Narsami siulittaasoq Josef Petersen isumaqarpoq nunami sulisinnaasut tunniusserusuttullu aatsaat iluamik sulisinnaalerpata namminiilivinissaq pisinnaasoq.
- Inuk sulerusussusilik nunaminut nanertuutaanani imminut pilersortoq, inuit taamatut alloriarnissamut piareerpata taava nunarput aatsaat namminiilivinnissamut piariilersutut oqaatigisariaqartutut uanga isigivara. Josef Petersen oqarpoq.
Siumut Tasiilaq:
Siumut Tasiilami siulittaasoq Aron Jonathansen isumaqarpoq tamatta namminiilivinnissamut ingerlanerput nalunngikkipput ornikkippullu, piffissanngorpallu takkukkumaartoq isumaqarluni. Qinersissutigineqaqqaassasorli isumaqarpoq.
- Pissusissamisoorpoq taasinissatta takkukkumaarnissaa, taakkuali innuttaasut aalajangerumaarpaat qaqugu taanna piumaarnersoq. Aron Jonathansen oqarpoq.
Namminiilivinnissaq qineqqusaarutaannaavoq
Namminiilivinnissaq tuaviunneqassanngitsoq qineqqusaarutaannaassanngitsorlu Siumumi borgmesteriutitatuaasoq Malik Berthelsen isumaqarpoq.
Taannalu isumaqarpoq aatsaat namminiilivinnermi aalisakkat aningaasarsiutigineqarnerisa nalitunerulersinneqarsinnaanerat, namminiilivinnissap aningaasaqarnikkut matussuserneqarsinnaaneranik isumalluarsaarisarneq piviusorsiortuunngitsoq.
- Namminiilivinnissamik anguniagaqarneq imminermini pissusissamisoortutut isumaqarfigivara, kisianni aqaguagunnguaq imaasiallaannarluni namminiilivinnissaq qineqqusaarutigineqartillugu tamatigut uanga amigaatigisartagara tassaasarpoq qanoq aningaasalersorneqarnissaanik tutsuiginartumik taamatut qineqqusaaruteqartuninngaanniit saqqummiussisoqartarnissaa. Malik Berthelsen oqarpoq.
Taassumallu ilanngullugu eqqaamaqquaa namminiilivinnissaq misigissutsit kisiisa aallaavigalugit anguneqarsinnaanngimmat.
KIm aamma Erik arriinnerusumik perusupput
Siulittaasumut qinigassanngortittut allat marluk namminiilivinnissamut isumaat pillugit KNR-ip aamma aperaat, taakkuli isuqatigiinnerupput, naamminiilivinissaq qularutiginngilaat qaquguli pinissaa akisinnaanagu.
- Aningaasarsiornikkut, ilinniagaqassutsikkut, peqqinnisaqarfikkut isumaginninnikkullu kivitassagut piareersartigit. Taakkua pingaarnertut isigeqqaartariaqarpagut. Taava ullulernagu, kisianni namminiilivinnissap aqqutaani ujaqqat tamaasa piiartussaassavagut. Kim Kielsen oqarpoq.
Erik Jensen assingusumik isumaqarpoq:
- Nunatta qaqugu namminiilivinnissaa ullulerneqassanngitsoq Siumumi isumaqatigiissutigaarput. Nunattali suliassaqarfiit qaqugu sorliillu piffissami aggersumi akisussaaffigilersinnaanerai oqallisigisariaqarparput.
Siulittaasumik qinersineq sapaatiuppat pissaaq.
