PFA Soraarneq ukiortaami matussaaq
Maannakkut qulakkeerlugu nalunaarutigineqarpoq PFA Soraarneq ukiortaamit matussasoq , tamannalu pippat tassani sullissaasut PFA Pensionimut nuunneqassasut.
Soraarnerussutisiaqarnermut aningaasaateqarfik tallimanngornermi tusagassiuutinut taama nalunaaruteqarpoq.
Aningaasaateqarfiup pisortaata Lis Haslingip siorna aasakkut uppernarsarlugu oqaatigaa PFA Soraarnermi sullinneqartut 6400-it taakkua soraarnerussutisiassaminnik 1,2 milliardit koruuninik katersaqartut, danskit soraarnerussutisiaqarfianut PFA Pensionimut nuunneqarnissaat pilersaarutaasoq.
AAMMA ATUARUK PFA Soraarnermi katersat PFA Pensionimut nuunneqassapput
Soraarnerussutisiaqarfiup ataatsimeersuarnerani, PFA Soraarneq ukiortaami matussasoq aalajangerneqarpoq.
Aningaasartuutikillisaataallunilu amerlanerusunik nioqquteqalersitsissaaq
PFA Soraarnermi siulersuisuni siulittaasoq Niels Nielsen tusagassiorfinnut nalunaarummi ima oqaaseqarpoq:
- PFA Soraarneq ukiuni kingulliunerusuni sullissanit aaqqiissutinik nutaanik pilersitsinissamik aammalu aaqqiissutinik digitaliusunik pisariaqartitsineq pillugu ujartuiffigineqarluni saaffigineqartalersimavoq, Niels Nielsen oqarpoq, nangillunilu:
- Saaffiginnissutit taaneqartutut ittut naammasserusuppagut, taamalli iliussagaani ineriartortitsinissaq pisariusuullunilu akisuujussaaq, kissaatiginngilarpullu sullissatta aningaasartuutinik qaffanneqartunik akilersuisussanngortinneqarnissaat, Niels Nielsen tusagassiuutinut nalunaarummi taama oqarpoq.
- Taamaattumik PFA Soraarnermi siulersuisut aallartitaasullu ataatsimeersuarnerminni inassutigivaat PFA Soraarnermi sullissaasut PFA Pensionimut nuunneqarnissaat, tassanimi periarfissat ujartorneqartut inerisarneqareernikuummata, PFA Soraarnermi siulersuisunut siulittaasoq Niels Nielsen taama oqarpoq.
AAMMA ATUARUK PFA Soraarneq udskyder flytning
Kristian Lund Pedersenip , PFA tusagassiuutinut attaveqarnermi pisortap KNR-imut nalunaarutigaa, soraarnerussutisiaqarfiup sullissaminik oqaloqateqartarnini aallartinniaraa, PFA Soraarnerup matunerata kingorna periarfissat suunersut paasiniarlugit.
Matusinissaq akuerineqaqqaassaaq
PFA Pensionip tusagassiuutinut nalunaarutaa naapertorlugu, PFA Pension tassaavoq Danmarkimi soraarnerussutisiaqarnissamut ingerlatsiviit namminersorlutik ingerlasut annersaat 500 milliardit koruuninik aqutsisuusoq aammalu 1,2 millionit missaannik ilaasortaqartoq.
PFA Soraanerup matuneqarnissaa, Danmarkimi aningaasaqarnermut nakkutilliisoqarfimmit taamatullu inuussutissaqarnermut ministereqarfimmit akuerineqarnissaa PFA Pensionemit ilimagineqarpoq.
Aningaasaqarnermut Nakkutilliisoqarfiup ilaatigut qulakkeertussaavaa PFA Soraarneq nuunneqarpat soraarnerussutisiaminnik katersuisimasut ajornerusunik atugaqalinnginnissaat.
