PFA Soraarnerup nuunneqarnissaa kinguartinneqarpoq

PFA Soraarnermi ileqqaakkat 6.000-isut Danmarkimut PFA Pensionimut nuunneqarnissaat aappaagumut ukiup naaneranut kinguartinneqartoq, PFA Soraarnermi pisortaq Lis Hasling oqarpoq.

Ukiortaamiit nuunneqarnissaa pilersaarutaasimagaluarpoq. Danmarkimulli nuussisoqarneratigut sullinneqartut ileqqaakkaminnit 45 procentimik akitsuutinik akiliisinneqarnissaat Danmarkimi Aningaasaqarnermut nakkutilliisut akuersaanngimmassuk unitsinneqarpoq. 

Ileqqaakkanik nuussinissamut killiliussaq ukiup naaneranuusussaagaluarpoq, ukiortaamiilli akitsuut qaffappat 55 procentinngortussaavoq. 

PFA Soraarnermut piginneqataasunit AK-mit pappilissat KNR-mut tunniunneqartut naapertorlugit Namminersorlutik Oqartussat qanimut oqaloqatigineqarsimasoq, pisortaq ilisimatitsivoq, tamatumalu kinguneranik isertitat akileraarutit pillugit inatsit allanngortinneqarsimalluni.

Tassa ileqqaakkat nunatta avataanut allamut nuunneqassappata kommunerisami akileraarut naapertorlugu 42-44 procentimik akitsuummut akiliuteqartoqassaaq, kommuunimili sorlermiinnerluni apeqqutaaginnarpoq.