PFA Soraarnermi katersat PFA Pensionimut nuunneqassapput
- Piginneqatigiiffimmi immikkut ataatsimeersuarnermi taama aatsaat aalajangiisoqarsinnaavoq, sulilu taama pisoqanngilaq. Kisianni ilumoorpoq suliaq aallartisarneqalereersoq, aamma tamanna pillugu aningaasaqarnermut nakkutilliisut aallarnersaataasunik ataatsimeeqatigereerpagut, pisortaq Lis Hasling oqarpoq.
Piginneqatigiiffiup soraarnerussutisiaqalernissamut katersat avammut nuunniagai 6000-iupput, katersallu piginneqatigiiffimmiittut 1,2 milliardit koruuninik naleqarput.
Soraarneq akisusoq
Soraarnerussutisiassanik katersinermi aaqqisseriaatsinik nutaanik inerisaanerup akisunera inatsisitigullu piumasaqaatit amerlineri soraarnerussutisiassatut katersat nuunnissaannut ilaatigut peqqutaasut, pisortaq nassuiaavoq.
Nuunngippata aningaasartuutit tamakku katersaqartunut, PFA Pensionimut Danmarkimiittumut naleqqiullugu amerlanerusunik aningaasartuuteqareersunut, akisunerulissapput.
- PFA Soraarneq piginneqatigiiffittut namminersorluni ingerlavoq, tassalu ingerlatseqatigiiffiup ingerlatsinera PFA Soraarnerup nammineq akilertarpaa, Lis Hasling oqarpoq.
PFA Soraarnerup sullitaasa soraarnerussutisiassanut aningaasartuutai PFA Pension Danmarkimiittumut naleqqiullugu kisitsisaataasut naapertorlugit marloriaammik amerlanerupput
- PFA Soraarnermi katersaqartut sillimmasiinermi aningaasartuutaat 2015-imi 1431 koruuniupput, PFA Pensionimilu 765 koruuniullutik.
PFA Soraarnerup pilersaarutini piviusunngortissappagu soraarnerussutisiassani katersat nalingisa 45 procentii Namminersorlutik Oqartussat ataasiartamik akitsuutitut akilissavaat.
Tamaviaarpoq
PFA Soraarneq pilersaarummik piviusunngortitsinissamut tamaviaarpoq, januaarimmi aallaqqaataaniit akitsuut 10 procentpointimik, tassa 55 procentinngorlugu, qaffanneqassaaq.
- Soraarnerussutisiassanut katersat ukiormanna nuunneqanngippata allatut aaqqiissutissarsiussaagut, sullitammi ajornerusumik atugassaqannginnissaat qulakkeerneqartariaqarpoq, PFA Soraarnermi pisortaq Lis Hasling oqarpoq.
Soraarnerussutisiaqalernissamut katersat avammut nuunneqarnissaannik aningaasaqarnermut nakkutilliisut Danmarkimiittut akuersisuusussaapput.
