Arnat suliniaqatigiit: Persuttaaneq akiorniarlugu suliniut ajunngikkaluaqaaq, kisianni aningaasartassai naak

Naalakkersuisut imigassamik aalakoornartumik atuineq annikillisarniarpaat qimarnguiillu amerlanerit pilersikkusullugit. Kisianni aningaasanik malitseqarnissaat pingaaruteqartoq, suliniaqatigiiffik 8. marts-gruppi Nuummiittoq isumaqarpoq.

Allattoq Thor Bill

septembarip 20-at 2023 10:46

Nutserisoq Najâraq Egede

Kalaallit amerlavallaarujussuartut angerlarsimaffimminni peruttagaasarnerat iliuuseqarfigineqarusuppoq. Taamaattumik naalakkersuisut iliuusissatut pilersaarummik nutaamik, qanigisanut nakuusertarnermik pinaveersaartitsinermut killilersuinermullu atatillugu suliniuteqarfissanik taakkartuiffiusumik, saqqummersitsipput.

Nakuusertarnerit unitsinniarutsigit akisussaaffittut tigullugu ataatsimoorluta nakuuserneq akiorniartariaqaripput, meeqqanut, inuusuttunut ilaqutariinnullu naalakkersiusoq, Aqqaluaq B. Egede (IA) oqarpoq.

- Kalaallit Nunaanni innuttaasut nakuusernermik atugaqarlutik inuuneqannginnissaat Naalakkersuisut anguniagaraat iliuusissatullu pilersaarut manna atorlugu kialuunniit qanigisariinni nakuusernermik atugaqarluni inuunnginnissaata aamma meeqqat inuusuttullu toqqissillutik peqqissuullutillu peroriartornissaasa tamattalu nakuusernermik unitsitsiniarnitta qulakkeernissaanik Naalakkersuisut kissaateqarput, tusagassiorfinnut nalunaarummi allappoq.

Iliuusissatut pilersaarummi suliniuteqarfissat:

Suliniuteqarfissat sisamat uku suliariniarneqarput taakkulu immikkoortuni tullinnguuttuni sukumiinerusumik takutinneqarput:

Nakuusertarnerit imigassamut aalakoornartortalimmut attuumassutillit ikilisinneqassapput

Naalakkersuisut suliffeqarfiutillillu imigassamik aalakoornartortalimmik tuniniaasartut suleqatigiinnissamik oqaloqatigiinnermillu qaninnerusumik aallartitartik pitsanngorsassavaat. Aamma Allorfik imigassamik aalakoornartortalimmik atornerluisuunermut suliassaqarfimmi suliniutinut aallartereersunut ilaareersoq nakuusertarnerit imigassamut aalakoornartortalimmut attuumassuteqartarmata pinaveersaartitsinermut atatillugu ineriartorteqqinneqassaaq.

Qimarnguiit patajaallisarneqassapput amerlanerillu pilersinneqassapput

Illoqarfinni tamani qimarnguinnik pilersitsinissaq anguniarneqassaaq, soorluttaaq nuna tamakkerlugu nakuusernermik eqqugaasut iserfissaqarnissaat siunnersorneqarnissaallu qulakkeerniarlugu neqeroortoqartassalluni.

Angerlarsimaffimmi nakuusertarneq unitsinneqassaaq, nakuusernermik eqqugaasunut nakuusersimasunullu pitsaanerusumik katsorsaanerit

Ilaqutariinnut sullissiviit nakuuserfigineqarsimasunut qanigisaannullu ikiuunnissamik neqerooruteqarnerusinnaanngorlugit ineriartortinneqassapput nakuusertartunut najugaqarfissanik pilersitsinissaq siunertaavoq, taamaasillutik nakuusernermik eqqugaasut angerlarsimaffimmiiginnarsinnaammata. Nakuusernermik eqqugaasunut psykoterapeutiskimik katsorsartinnissamik neqerooruteqarfigineqartassapput, aamma iolitiit inunnillu isumaginnittoqarfiit akornanni suleqatigiinneq ilungersunaraangat qanoq isilluni suleqatigiinneq tapersersorneqarsinnaanersoq, ilaqutariillu nakuusernermik ajornartorsiorfiusut nassaariniartarnerat patajaallisarneqarsinnaanersoq misissortariaqarpoq.

Qanigisaasuni nakuusertarneq pillugu ilisimasaqarneq annertusarneqassaaq, meeqqat inuusuttullu akornanni pinaveersaartitsineq immikkut ukkatarineqarluni

Ilinniartitsissutip ”Tassa!”-p ineriartortitsiffigeqqinnissaa, tassani atuartut nakuusertarnerup pinaveersaartitsiffiunissaa pillugu ilinniassapput. Tarnikkut nakuusertarnerup qanoq pisarnera qanorlu iliorluni iliuuseqarfigineqarsinnaanera eqqugaasunut, nakuusertartunut qanigisaasunullu ersarissarniarlugu paasititsiniaasoqassaaq.

Allisiguk

Kalaallit Nunaanni Politiit ukiumoortumik nalunaarutaanni siornamut tunngasumi angerlarsimaffinni eqqissiviilliornerit 2.524-it aamma persuttaanerit 1.090-it nalunaarutigineqarsimapput. Taaneqartut tassaapput politiinut suliassatut saaffiginnissutigineqartuinnaat. Taamaattumik kisitsit annerujussuusinnaavoq.

Ajornartorsiutip ilungersunartuunera paasillugu naalakkersuisut iliuuseqalernerat isumalluarnartutut Inge Olsvig Brandtip isumaqarfigaa. Inge Olsvig Brandt suliniaqatigiiffimmi ”8. marts-gruppen i Nuuk”-mi ilaasortaavoq IA-lu sinnerlugu Kommuneqarfik Sermersuup kommunalbestyrelseani ilaasortaalluni.

- Siullermik oqaatigissavara nuannaarutigalugu Naalakkersuisut persuttaasarneq aammalu imigassamik atornerluisarneq akiorniarlugu suliniuteqarmata nutaamillu pilersaarusiorsimallutik. Kingumut qiviarutta pilersaarut siulleq immaqa tamakkiisumik sunniuteqarsimanngimmat, taamaammat nuannaarutigilluinnaqqissaarpara nutaamik suliaqartoqarsimasoq.

Aalakoornartukinneq qimarngueqarnerunerlu

Iliuusissatut pilersaarusiaq suliniuteqarfissanik sisamanik pingaarnerutillugit iliuuseqarfissanik saqqummiiviuvooq, ilai marluk tassaapput, nakuusertarnerit imigassamut aalakoornartortalimmut attuumassuteqartut ikilisarnissaat aamma nunatsinni tamarmi nakuusernermik eqqugaasunut qimarnguiit amerlinissaat.

Aamma atuarukPolitimesteri: Imigassamik atueriaaserput allanngortittariaqarparput

Taakkorpiaallu Inge Olsvig Brandtip suliniuteqarfissatut siunnerfigisimasaani qitiupput, imigassamimmi aalakoornartortalimmik atuineq suliniuteqarfissanut ilungersunarsinnaasunut ilaalluinnarmat.

- Ajornartorsiuterujussuuvoq, immaqa oqaluuserinngippallaakkatsitut oqaatigisinnaasarput. Tassaavoq aningaasarsiffiup nalaani imigassamik aalakoornartutortarnerujussuaq. Inersimasorpassuit ukiorpassuarni atuipiluttarnerat maanna aamma inuusuttortatsinni takussaalereerpoq. Taamaammat suliarujussuusinnaavoq.

Qimarnguiit amerlanerulernissaanik aamma anguniagaqalerneq Inge Olsvig Brandtip maluginiarpaa. Erseqqissaatigaluguli, qimarnguiit siunnerfimmissut ingerlassappata sulisui amerlanerusariaqartut.

- Nalunngisakka malillugit, Qimarnguiit arlallit nammineq kajumissutsiminnik sulisunik sulisoqarput, nunatsinni ajornartorsiut persuttaasarnermik ajornartorsiut taamak annertutigisoq nammineq kajumissutsiminnik sulisunut akisussaaffik tunniutissallugu annertoorujussuuvoq. Aningaasaliiffigineqartariaqarput sulisunik ilinniarsimasunik sulisoqartariaqarput, taavalu aamma persuttaasarnerup akiornissaanut aamma annertunerujussuarmik arlaatigut ilinniartariaqarpugut. Taava maluginiakkama ilagivaat aamma uunga tunngatillugu tassa politiit 2022-mi nalunaarusiaanni saaffiginnittut ikilisimasut. Nalunaaqutaq aalajangersimasoq nalunaarsinnaaneq pisaraluartoq saaffiginninnerit iluatsittanngitsut oqaatigineqarpoq.

Aningaasanik malitseqarlik

Kajummissusertik tunngavigalugu sulisunit qimarnguit ammatinneqartarnerat, tassaavoq iliuusissatut pilersaarut kinguneqarluassappat iliuuseqarfigisassat pingaartut ilaat. Iliuusissammi piviusunngussappata aningaasat amerlanerit pisariaqartinneqartut, Inge Olsvig Brandt isumaqarpoq.

-Pingaaruteqartorujussuuvoq aningaasaliinissaq periusissiat suugaluartulluunniit, sualummik ajornartorsiutinut taamak annertutigisunut aningaasaliinngikkaanni taava immaqa suliassap kivinnissaa ajornakusoorsinnaassaaq, anguniagassallu anguneqanngitsoorlutik. Nammineq kajumissuseq aallaavigalugu suliniuteqarneq imminermini ajoquteqanngilaq tamattaana inuiaqatigiinni pisariaqartilluinnaqqissaagarput, kisianni suliassat taamak annertutigisut pingaaruteqartigisullu iliuuseqarfigineqarnissai isumaqarpunga aningaasaliiffigineqartariaqartut. Aatsaanguaq assersuutigaakka angutit oqaloqatiginnittartut namminneq kajumissutsiminnik sulisut, aap kommunet allallu immaqa inimik oqaloqatigiiffissamik tunisisinnaapput, kisianni sulineq annertooq namminneq kajumissutsiminniinnaq ingerlanneqassappat aamma taanna annertuumik artukkiisinnaavoq pingaartumik aningaasanik malitseqartitsisoqanngippat nukippassuillu atorneqarpata tamanna arlaatigut qasutitsisinnaavoq, oqarpoq nangillunilu:

Læs også Politimesteren: Vi skal ændre den måde vi drikker alkohol på

- Ilinniarsimasunik sulisoqareeraluartoq aamma paasisitsiaanermi suleriaatsinik aamma paasisitsiniaanerit qanoq ittuugaangata iluatsittarnerinik ilinniarsinnaasoqartariaqarpoq. Taamaammat aningaasaliissutissat pingaaruteqartorujussuupput. Kajumissutsiminnik sulisut kisimik naammanngillat.

Iliuusissatut pilersaarut malillugu ukioq manna suliniuteqarnerit aallartissapput. Suliniutillu 2027-p tungaanut iliuuseqarfigineqassapput.