Perorsaasut sulisussaaleqineq pissutigalugu stressilersartut
Nunatsinni meeqqerivinni perorsaasussaaleqisoqarnera, Nunatsinni Perorsaasut Kattuffiannit aamma ernummatigineqarpoq.
Perorsaasutut ilinniarsimasunik meeqqerivinni sulisoqanngippat meeqqat ilaasa sumiginnagaalersinnaasut, kattuffiup siulittaasuata Naussúnguaq Bisgaardip ernummatigaa.
Kommune Kujalleq - 26
Kommuneqarfik Sermersooq - 49
Qeqqata Kommunia - 32
Kommune Qeqertalik - 17
Avannaata Kommunia - 8
Katillugit - 132
Najoqqutarisaq: Nunatsinni Perorsaasut Kattuffiat, NPK
Meeqqammi immikkut ikiortariaqartut eqqorneqarsinnaasut, taassuma oqaatigaa:
AAMMA ATUARUK Perorsaasussaaleqineq sanngiinnernik eqquivoq
- Uagut perorsaasutut ilinniarsimasuusugut suligutta meeqqat atuarsinnaavagut sumiginnagaappata. Perorsaasorpassuillu amigaataanerat pissutigalugu ilimagaarput katataasorpassuaqartoq. Assersuutigalugu aatsaat atualereeraangata atuarfimmi aatsaat paasineqartarpoq meerannguaq una sumiginnagaavoq. Mikineraniilli perorsaasutut ilinniarsimasunit paarineqarsimasuuguni takuneqarsimasinnaagaluarpoq una siumoortumik ikiorneqarsimasussaagaluarpoq, Nunatsinni Perorsaasut Kattuffianni siulittaasoq Naussúnguaq Bisgaard taama oqarpoq.
Innarluutillit, meeqqallu atornerlugaasimasut, perorsaasunik amigaateqartoqarnera pissutigalugu takuneqanngitsoorsinnaasut perorsaasut siulittaasuata oqaatigaa.
- Taama amigartigippata perorsaasutut atorfilik ulaperujussuartarpoq. Taamaakkami tusarsaagaluttuinnarpoq qasullutik stresserlutik sivisuumik sulinngiffeqartariaqarlutik pisartut, Nunatsinni Perorsaasut Kattuffiannni siulittaasoq Naussúnguaq Bisgaard taama oqarpoq.
AAMMA ATUARUK Pædagogmangel er landsdækkende problem
Taamatut inissisimasoqarnera illersorneqarsinnaajunnaarnissamut qanittutut Kommuneqarfik Sermersuup ingerlatsivianit sapaatit akunnerata siuliani oqaatigineqarpoq.
Perorsaasut kattuffiata kisitsisaatai naapertorlugit nunatsinni kommunit ukioq manna marsip qaammataani perorsaasunik 132-nik amigaateqarput.