Peqqissaasut Kattuffianni siulittaasoq soraarsinneqarpoq: - Ken annertuumik suliniuteqarsimavoq
Peqqinnissaqarfimmi sulisut peqqissaasullu akissarsiaat pillugit isumaqatigiinniarnerit eqqissiviilliorfiusut kingorna, isumaqatiginninniarneq nutaaq aallartippoq.
Peqqissaasut Kattuffianni siulittaasussamik sapaatip-akunnerini marlunni qinigassanngortitsineq ingerlanneqarnikuuvoq.
Tassani ilaasortat aalajangerput Ken Jensen ukiuni qulingiluani siulittaasuusimasoq tunuartinniarlugu. Navarana Helena Johansenilu siulittaasutut qinerneqarlpoq.
Tamanna PK-p tusagassiuutinut nalunaarutaani atuarneqarsinnaavoq.
Naak siulittaasuujunnaalersoq Navarana Helena Johansenimit oqaaseqarfigineqanngikkaluartoq, siulittaasup tulliata siulittaasuusimasup angusai oqaaseqarfigai.
- Ken ilaasortatsinnut annertuumik suliniuteqarsimavoq. Pingaarutilinnik angusaqarsimavoq minnerunngitsumillu PK-mi unammilligassatsinnik isumannaatsumik aqutsisimalluni. Suliassaminut tunniusimanera maluginiarnartuuvoq, tamannalu siunissami sulinitsinni tunngavigissavarput, siulittaasup tullia Tania Vodstrup oqarpoq.
Akisussaaffik annertooq
Navarana Helena Johansenip qinersinerup kingorna siullerpaamik tamanut ammasumik oqalugiarnermini akisussaaffik annertooq maanna tigulerini erseqqissarpaa.
- Peqqissaasut Kattuffianni siulittaasutut qinigaanera qujamasutigingaarlugulu nuannaarutigaara. Siulittaasutut akisussaaffik tigussallugu piareersimavunga, peqqissaasullu atugaat pitsanngorsarniarlugit sapinngisara tamaat siuttuussaanga, tusagassiuutinut nalunaarummi oqarpoq.
Navarana Helena Johansen 40-nik ukiulik 2012-imi peqqissaasutut ilinniarsimasunngorsimasoq tusagassiuutinut nalunaarummi allaqqavoq. Tamatuma saniatigut nakorsiartitsinermi siunnersortitut, psykoterapeutitullu ilinniagaqaqqissimavoq aammalu ilinniartitsinermi allannguiniarnermilu ingerlariaatsini kandidatinngorsimalluni.
Novembarip 27-ani ataatsimeersuartoqareerpat siulittaasuuneq pisortatigoortumik nikissaaq.
