Utoqqaat pillugit oqaaseqartartoq: Utoqqaat illui sulisulersorneqarnerusariaqarput

Utoqqaat illuanni puigortunngortut immikkoortuanni najugaqartut ilaat, marlunngornerup unnuaani ajunaarpoq. Igalaap qajannaarsaataa aaqqitassap atorneqarsinnaannginnera pissutaalluni, najugaqartoq igalaakkut nakkarpoq.  

- Utoqqartagut qanoq sianigisassaatiginerannik alianartumik eqqaasinneqarpugut - pingaartumik puigortunngornikut isumassorneqarnissaminnik toqqissisimatinneqarnissaminillu pisariaqartitsiualernikuusut, utoqqaat pillugit oqaaseqartartoq, Kiista P. Isaksen oqarpoq.

Utoqqaat illersuisuisa nalunaarusiaanni 2023-meersumi, utoqqaat illuini puigortunngorsimasut immikkoortortaqarfiani sulisussaaleqineq pissutigalugu sulinerup ilungersunartuunera, sulisullu suliassatik ilaannikkut naammassiuminaatsittaraat allaqqavoq.

- Utoqqaat illuini sulisussanik amigaateqarneq sulinermik atugassarititaaginnanngitsoq — inuunermulli isumannaassusermullu tunngassuteqartoq, pisup tamatuma erseqqissarpaa. Sulisut ikippallaarpata, ajunaartoqarnissaanut navianartorsiorneq sumiginnaanissarlu annerulersarpoq, Kiista P. Isaksen oqarpoq.

Siunissami assingusumik pisoqarnissaa pinngitsoortinniarlugu periutsit tamaasa misissoqqissaarneqassasut, kommuni nalunaarpoq

Tamanna alloriarnerusoq pingaarutilik, Kiista P. Isaksen oqarpoq, tamannali kisiartaassanngitsoq ilanngullugu oqaatigaa. 

- Pisortaqarfiit pisumik sukumiisumik misissuisitsinissaannik kajumissaarpakka, aammattaaq nuna tamakkerlugu utoqqaat illuini sulisoqarnerup tungaatigut sulinermilu atugassarititanik pitsanngorsaanissaannut iliuuseqaqqullugit. Utoqqartagut ataqqineqarlutik eqqissillutik utoqqaliartortussaapput, taanna oqarpoq.

Kikkut tamarmik pisoq aalassaqqassutigigaat utoqqaat pillugit oqaaseqartartup aamma oqaatigaa.

-  Ilaquttaasulli qanigisaasullu asasaminnik annaasaqarsimasut eqqarsaatiginerpaavagut, taanna allappoq.