Atuarfik Inussuk atuarfittut nutaatut atortutut nittarsaanneqarpoq – sulili atulerneqanngilaq

Nuummi atuarfik nutaaq illoqarfiup ilisarnaatertaavatut kulturikkullu naapiffittut inoqatinut attaveqaatikkut LinkedIn-ikkut nassuiaatigineqarpoq.

Piviusorli allaavoq. Atuarfimmi suli atorneqalinngilaq, Kommuneqarfik Sermersoorlu suliniummik nakerisarsiunngitsumik misissuinermik aallartitsivoq.

Illuliassanik titartaasarfiup KHR Architecture – ARX-ip ilaata atuarfissamik ilusilersuisuusup atuarfiup nutaap nunatta pinngortitaa kulturialu atorlugit qanoq ilusilersorneqarsimanersoq nassuiaatigineqarpoq. Illorsuaq qaarsuup ilusaanik isumassarsiaavoq, qulaanit qaamaneq inunut ataatsimoorfiusunut qaamaneqartitsissaaq, illorsuullu saava uumasunik naasunillu kusassaasersugaasoq pinngortitamut ilisarnaatinik pilersitsillunilu attaveqarnermik takutitsissaaq.

Atuisut tigusilluartut

Illussanik titartaasartut oqarnerat naapertorlugu atuarfik atuartitsinermut pitsaanerpaanik sinaakkuteqaannarani illoqarfimmi naapiffittut nutaatut atorneqassaaq.

- Innuttaasut atuarfimmik nutaamik qanoq tigusilluartiginerat nuannerpoq, KHR Architecture-imi creative director, Janina Zerbe oqarpoq.

- Atuarfimmik atuisussat suleqatigalugit atuarfik pilersillutigulu sumiiffimmi kulturi tunngavigalugu atuarfik ataatsimoornissamut inissaqartitsisoq pilersipparput, meeqqallu inuunerminnik pitsaanerpaamik aallartinnissaanut periarfissiilluta, videomi nassuiaateqartoqarpoq.

Ajornartorsiutaasoqaannarporli – atuarfik suli inoqanngilaq.

KNR-ip illussanik titartaasartut atuarfik atuutilereersutut qanoq ilillutik saqqummiussinnaaneraat nittarsaassinermillu videomik immiussinermi nalaani atuarfiup suli atuutilinnginnera ilisimaneraat akissuteqartinniarlugit attavigai.

Illussanik titartaasartut suliaq pineqartoq oqaaseqarfigisinnaanagu, Janine Zerbep allakkatigut akissuteqarfigaa.

Janina Zerbelli pineqartoq “atuisut tigusilluarlutik akissuteqarnerat” atuarfiup ingerlanneqarneranut tunngassuteqarani atuisunik suleqateqarsimanermut kiisalu sulisunik paaqqutarinniffimminnut atassuteqartunik atuutilereersunik oqaloqateqarnermut tunngassuteqarnerarpaa.

Sanaartornerup kinguaattoornera pillugu pisortatigoortumik kingullermik nassuiaat 2024-mi decembarimeersuuvoq, tassanilu Kommuneqarfik Sermersuup ikuallattoqarnissaanik sillimaniarneq sanaartornermut kinguaattoorutaanera pillugu siorna aggustimi nalunaarutigineqartutulli

'ikuallattoqarnissanut sillimanermut tunngasunik suli ajornartorsiuteqartoqartoq' tusagassiuutinut nalunaarummi allaaseraa.