Peqqissaasoq coronavirus pillugu: Tupannartorujussuuvoq
Qeqertarsuarmeersoq 32-nik ukiulik Lars Pavia Sandgreen Danmarkimi peqqissaasututut sulilerlaajuvoq. Kalaallinullu nualluut pillugu oqariartuutissaqarpoq. Taanna isumaqarpoq kalaallit ilaasa nualluut ilumoorutassatut isiginngikkaat.
- Tupannarpoq, nalunarpoq qanoq nassuiassanerlugu kisianni ilimagisaminngaanniit sakkortuneruvoq aamma tupaallannarsigaluttuinnarpoq, Lars-Pavia Sandgreen oqarpoq, taanna ukiut qulingajaat Danmarkimi najugaqarpoq.
Nunatsinni nutaarsiassanut oqallittunullu malinnaasarluni oqaatigaa. Naak amerlasuut oqartussanut ataqqinnillutik maleruaqqusanik malinnikkaluartut ilaasa nualluut 'oqippallaamik tigugaat' taanna naliliivoq.
- Nammineq misigalugu suliffimmilu isigialugu tupannartorujussuuvoq, suleqatit napparsimalerlutik peruluttut uninngasuutigut aamma napparsimaleriataartut, Lars Pavia Sandgreen oqarpoq. Taanna Aarhusimi napparsimmavissuarmi peqqissaasuuvoq.
Lars Pavia: Uanga aamma ernumanngikkaluarpunga
Coronavirusimik Kinami 2019-imi decembarimi tunillatsittoqarneraniit virusi nunarsuup ilarujussuanut siaruaappoq - nunatsinni tunillatsissimasut maanna quliupput.
AAMMA ATUARUK Tamaat isigalugu: Coronavirus pillugu killiffik
Tunillanneqarsimasunit pingasut maanna peqqisseqqissimapput. Tunillanneqarsimasut qulit tamarmik Nuummi angerlarsimaffimminni mattuteqqapput.
Nualluut tusarsaaleqqaarmat ernumasimanngikkaluarluni Lars Paviap nassuerutigaa.
- Uanga aamma nammineq oqippallaamik tigugaluarpara.
- Suleqatimma soorlu aamma utoqqaanngitsut napparsimallutik oqaluttuuppaannga tujorminartorujussuusoq aqajaqqumikkut nukimikkulluunniit anniarlutik. Uippakajaarnarpoq.
Piareersarluarnissaq pisariaqarpoq
Taamaattumik nunatsinni peqqinnissaqarfinnut siunnersuutissaqarpoq.
- Kalaallit Nunaata peqqinnissaqarfia eqqarsaatigalugu isumaqarpunga piffissaq sioqqullugu piareersarluassasut. Eqqarsaatigisinnaasaat tusarsimasaat sakkortugaluartut upperiuminaakkaluartut upperalugit, Lars Pavia Sandgreen oqarpoq. Taanna nunatsinni peqqinnissaqarfinni ikiortitut sulisarnikuuvoq.
Innuttaasut aamma qisuariaatigisinnaasaat eqqumaffigineqassasut taanna oqarpoq.
- Peqqinnissaqarfimmi ulappukkaluarluta avataaninngaanniit innuttaasut uippakajaarneri malunnartorujussuuvoq.
Sprittinik tillinniat
Napparsimmavimmut soorlu tillinniartoqartartoq, Lars Paviap naammattoorpaa.
- Sprittit 22-rsuit tigullugit aniartortoqaleraluarpoq.
- Peqqinnissaqarfiit siunnersorusuppakka piareersarnermi saniatigut innuttaasut uippakajaarneri aamma nakkutigilluaqqullugit. Inuit iliuusaat aamma tupannalaaramik.
Pisariaqalissappat nunatsinnut suliartorsinnaalluni Lars Pavia Sandgreen oqarpoq.