Peqqinnerunissaq

Nunavumi meeqqat inuusuttullu akornanni sodavand-nik Cola-nillu imigaqartarnerujussuat allanngortinniarlugu, Nunavumi peqqissutsimik suliallit suliniuteqarnialerput.

Suliniarnermut ilaavoq meeqqanik ulluni tallimani cola-tortitsinaveersaarneq. Ulluni tallimani meeqqat cola-nik imernaveersaarlutik imiinnarmik juicemilluunniit imersimasut, timersornermut atortunik imermillu pinnataqassasut, Nunavumi pisortaqarfimmi nerisassanik paasisimasalittut atorfilik, Amy Caughey oqarpoq.

Iqalunni pisiniarfiit imeruersaatinik peqqinnartunik akikilliliiniarlutik aamma neriorsuisimapput.

Iqalunni Coca-cola-mik maqitsivik Coca-colat 2 liiterikkaartut ullormut 4000-it maqittarpai, puiaasallu minnerit ullormut 20.000-it maqinneqartarlutik. Nunavumi innuttaasut katillugit 26.000-iupput, agguaqatigiisillugulu innuttaasut minnerpaamik Coca-cola ullormut ataaseq imertarpaat.

Nunavumi peqqissuunissaq peqqinnartunillu imigaqartarnissaq anguniarlugu sapaatip akunnerani uani suliniuteqarneq, nunatsinnilu assingusunik ajornartorsiuteqarneq aammalu Nunavumik suleqateqarnissaq ujartorneqassasoq, Peqqissutsimut Naalakkersuisoq Asii Chemnitz Narup oqarpoq.

- Tass maannakkorpiaq innuttaasut peqqissuunissaanik suliniut pillugu ilusilersuivugut. Suliniutissatta aamma ilagaa nerisatsinnik peqqinnarnerusunik nerisaqalernissaq, aamma maannakkut ilisimavarput meeqqat atuartut akornanni sodavandisornerujussuaq. Meeqqat inuusuttullu akornanni puallariartuinnarneq pisoq ilisimavarput, taamaammat pissusissamisoorpoq naggueqatitsinni suleqateqarnissaq, pissutsigummi ileequgullu assigiittorujussuupput, Asii Chemnitz Narup naggasiivoq.