Angut 38-nik ukiulik ukiuni sisamani pineqaatissinneqarsimasunut inissiisarfimmiittussanngortinneqartoq

Angut 38-nik ukiulik Sisimiuneersoq nukappiaqqanik 13-init 17-inut ukiulinnik kinguaassiutitigut atornerluisimasutut, unioqqutitsisumillu videoliorsimasutut ukiuni sisamani pineqaatissinneqarsimasunut inissiisarfimmiittussanngortinneqarluni Nunatta Eqqartuussisuuneqarfiani sisamanngornermi ullaap tungaani eqqartuunneqarpoq.

Kalaallit Nunaanni Politiit tusagassiuutinut nalunaarummi paasissutissiipput.

Meeqqat illuani meeqqat ilaannut tunngatillugu attaveqartoqarneratigut politiit suliamut tunngatillugu paasisaqarput.

Politiit angutip illuani ujaasinerminni angerlarsimaffimmit isertortumik immiussat 34.000-init ikinnerunngitsut nassaaraat, taakkunannga meeqqat inuusuttuaqqallu kinguaassiuutaannut tunngatillugu 2.344-t assilisaapput videoliallu katillugit ullunik 41-nik sivisussuseqartut 17.770-iullutik.

National Cyber Crime Centerip videolianit 416-it angutip maanna eqqartuunneqassutaanut suliamut attuumassuteqartutut nalilerpai.

Pinerluuteqartoq ilisimaneqareersoq

Angut 38-nik ukiulik nukappiaqqanik 13-init 17-it akornanni ukioqartunik arfineq-marlunnik kinguaassiuutitigut kannguttaatsuliorsimanermut tunngatillugu pissutsini katillugit arfineq-pingasuni pasineqarluni siorna apriilip 17-ianiilli tigummigallarneqalerpoq.

Nunatta Eqqartuussisuuneqarfiata angut eqqartuuppaa, ukiunili sisamani pineqaatissinneqarsimasunut inissiisarfimmiittussanngortillugu. Eqqartuussut tamanna Qeqqata Eqqartuussisoqarfiani maajip naanerani eqqartuussutigineqartumik allaaneruvoq. Eqqartuussisoqarfimmit eqqartuussuteqartoqarnerani paarineqartussanngortitsisoqaraluarpoq.

Eqqartuussiviulli politiillu angut pineqartoq aatsaat siullermeerlutik suliaqanngillat.

Unnerluussisussaatitaasoq, Alexander Stürup kalaallit Nunaanni Politiinit tusagassiuutinut nalunaarummi ima oqarpoq:

- Unnerluutigineqartoq pinerluuteqarnermi assingusumi ilisimaneqareersoq pineqarpoq, taassumalu tarnikkut qanoq inneranik misissuinermi nalunaarummi meeqqanik kajungerisaqartutut nalilerneqarnini ilisimavaa. Taamaammat unnerluussisussaatitaasut angutip paarineqartussanngortinneqarnissaanut apeqqut eqqartuussivinni misilinneqarnissaa pingaartippaat, kisianni nunatta eqqartuussisuuneqarfiata angutip paarineqartussanngortinneqartariaqarnissaanut navianaateqarnera qulakkeersinnaanngimmagu tamanna tusaatissatut tiguarput.