Løkkep Trumpip Danmarkimi aallartitartaava nunarput niuernerlu pillugit eqqartueqatigigaa
Amerikamiut Danmarkimi aallartitartaavat, Ken Howery, maanna sulilerpoq.
Niuertuusimasoq akiliisitsisarfimmillu PayPalimik pilersitseqataasup, nunanut allanut ministeri Lars Løkke Rasmussen (M) Københavnimi Asiatisk Pladsimi sisamanngornermi ataatsimeeqatigaa.
- Sivisuumik utaqqisimavarput, maaniinneralu nuanneqaaq. Trumpip (USA-p præsidentiata Donald Trumpip, aaqq.) aqutsisoqarfianit toqqaannartumik oqaloqatigisinnaasatsinnik Danmarkimi sinniisoqarnissaa pingaaruteqarpoq, Løkke ataatsimiinnerup kingorna oqarpoq.
Nunanut allanut ministeri naapertorlugu taakku marluullutik niuerneq aamma danskit USA-mi aningaasaliinerat, aammali Kalaallit Nunaat ilaatigut eqqartorpaat.
Nunatsinni nunanilu tamalaani isumannaallisaanissaq pissutigalugu "USA-p Kalaallit Nunaat pisariaqartikkaa" Donald Trumpip attammagu, Kalaallit Nunaannut tunngatillugu apeqqutip eqqartornissaa pisariaqarsimavoq.
Killiliussat taaqqikkai
Præsidentilli taamatut pisariaqartitsoqarnera tamanut kingullertigut oqaatiginikuunngilaa.
- Kunngeqarfiup killiliussai taaqqippakka. USA-p kunngeqarfimmillu, Danmarkip Kalaallit Nunaatalu siunissami suleqatigiinnissaannut sinaakkutissat eqqartorsimanngikkigut oqartoqarsinnaavoq, taakkununnga immikkut ittumik oqaloqatigiittarfeqarnerput pissutigalugu. Suut tamarmik ingerlalluarpata oqaloqatigiittarfiit taakku decembarip qaammataani atuleqqissapput, Lars Løkke Rasmussen oqarpoq.
Nunanut allanut tunngasunut ministerip Permanent Committee aamma Joint Committee innersuussutigai, kingullertullu taaneqartoq 1951-imeersuuvoq.
- Tamakku eqqartoqqilerpagut, pitsaasumik suleqatigiinnissaq pingaaruteqarmat. Tamannali oqaloqatigiittarfinni eqqortuni pissaaq. USA-p aamma Kunngeqarfiup Kalaallit Nunaatalu akornanni suleqatigiinneq nutaaq oqaluuserissagutsigu Vivian Motzfeldt peqataatittariaqarpara, Lars Løkke Rasmussen oqarpoq, nunatsinni nunanut allanut tunngasunut naalakkersuisumut innersuussilluni.
Tamanna pissutigalugu - Kalaallit Nunaanni nunanut allanut tunngasunut akisussaaup peqataannginnera - Ken Howeryp Lars Løkke Rasmussenillu Kalaallit Nunaat pillugu apeqqut „taamatut oqaloqatigiissutiginngilaat“.
- Oqartuaannarnikuuvunga suleqatigiinnissanut tamanut ammasugut. Soorunalimi killiliussaqarpoq. Kunngeqarfiup nunap immikkoortuinut ataqatigiinneranut tunngavoq. Ullumikkut taama oqanngikkuma eqqumiiginassagaluarpoq, taamaattumik soorunami taamaaliorpunga, nunanut allanut ministeri oqarpoq.
