Peqatigiiffik nutaaq islandimiut nerisassaannik finnisullu atuakkianik inuusuttunut Nunani avannarlerni ammaaniartoq

Unnuk islandimiut nerisassioriaasaannik imaluunniit finnimiusut atuakkianik ukkatarinniffiusoq?

Peqatigiiffiup nutaap tamakku ilaatigut suliaralugit inuit Nunat Avannarliit pillugit nutaamik ilisimasaqarlersissinnaanissaat neriuutigaa.

Peqatigiiffiup ’Foreningen Norden i Grønland’-ip pilersitsiviusumik marsip ulluisa 23-anni ataatsimeersuarnissaani peqatigiiffik pisortatigoortumik piviusunngortinneqassaaq siulittaasussamillu toqqaasoqassalluni.

Suliniuteqartut tassaapput kalaallit, islandimiut, savalimmiormiut skandinaviullu eqimattat nammineq kajumissutsiminnik suliaqartut. Irene Jeppson suliniuteqarnermi oktobarimili suleqataalersut kalaallit ilagaat.

- Inuttut piorsarsimassutsikkullu immitsinnut suli ilinniarnerusinnaasugut isumaqarpugut. Aamma imminut ilinniangaatsiarsinnaavugut, Irene Jeppson oqarpoq.

- Peqatigiiffik una amigaataasoraarput. Nuummi nunatsinnilu tamarmi inuiaassutsit assigiinngitsuupput, imminnullu ilinniarfigisinnaagutta nuannissaqaaq.

Nunat Avannarlerni periarfissarpassuusut

Soorli imminut ilinniarnerunissaq pingaaruteqarpa? Irene Jeppsonimut tamanna ilisimasanut ilinniarnermullu ilaatigut tunngavoq.

- Nunat Avannarlerni periarfissarpassuupput. Uanga inuusuttunik amerlanerusunik nunani avannarlerni piorsarsimassutsimik ilinniartitsinissaq ilinniariartortitsinissarlu pillugit Nunanut Avannarlernukartitsinissaq pingaarteqaara. Aammali illuatungaani – tassa maanna tikisitsinissaq.

Inuusuttut periarfissanik takunnissinnaalernissaat pillugu peqatigiiffiup oqaatsit, piorsarsimassuseq nunanilu avannarlerni ileqqutoqqat ukkatariniarpai. 

- Aaqqissuussinerit assigiinngitsuusinnaapput. Islandimiusut unnussiorneq islandimiut nerisassioriaasaanik ukkatarinnittoq. Kalaallisut unnussiorneq kalaallit piorsarsimassusaannik soorlu tivanermik imaluunniit qaannaliornermik qanoq ilinniarnissamik takutitsiviulaartoq imaluunniit unnuk finnimiut atuakkiaannik ukkatarinniffiuvoq.

- Aamma nunat assigiinngitsut akornanni isikkamik arsarnermik unammisoqarsinnaavoq imaluunniit nuersaaqatigiinneq. Imminut ilinniarnissamut periarfissarpassuupput, Irene Jeppson oqarpoq.

- Nuummi assersuutigalu naapittarpugut. Savalimmiormiut peqatigiiffeqarpoq, taakku namminnut susassaqartittarput, peqatigiiffilli Sverigeminngaanneeruit, Norgeminngaanneersuilluunniit tamanoorpoq.

Eqimattat nammineq kajumissutsiminnik suliniuteqartut Nuummiipput, peqatigiiffilli sineriammut aamma anngukkusuppoq.