Pele Broberg Danmarkimit tikeraartoqarnissaa pillugu: - Miiti angerlarsimaannarit

Danskit ministeriunerat, Mette Frederiksen Frankrigip præsidentia, Emmanuel Macron nunatsinnut sapaatiuppat tikeraarpat peqataasariaqanngilaq.

Naleqqap siulittaasua, Pele Broberg taama isumaqarpoq.

- Frankrigip præsidentiata Danmark tikeraarusussimasuuppagu nunatsinnukarani Danmarkiliassagaluarpoq, Pele Broberg tusagassiuutinut nalunaarummi allappoq.

Tikilluaqquneqanngitsoq

Macronip tikeraarnissaa pissutigalugu nunatta nunanut allanut politikkimut tunngatillugu Danmarkimik qaqugukkut pisariaqartitsinera inoqatinut attaveqaatitigut oqallisigineqangaatsiarpoq.

Illuatungiliuttut siuttuat uani qularutiginninngilaq: franskit præsidentiata tikeraarnera nunatta nammineq isumagisinnaalluarpaa.

- Akuleruttariaqanngikkaluarpoq, angerlarsimaannarniarli. Frankrigip præsidentiata Danmark tikeraarusussimasuuppagu nunatsinnukarani Danmarkiliassagaluarpoq, taanna oqarpoq, itisiliillunilu:

- Nunat allat sinniisui nunatsinnut tikeraassatillugit naalagaaffik sinnerlugu nunatsinniit oqaluunneqassaqqaarput, Pele Broberg oqarpoq.

Taassumalu tusagassiuutinut nalunaarutini ministeriunermut tusangiasaarummik naggaserpaa:

- Miiti angerlarsimaannarit, qallunaanik kilitsissiaanianik oqaluunnitsinni amigaateqanngilagut.