Meeqqanik kinguaassiuutitigut innarliinermi sivisunerusumik pineqaatissiineq inuiaqatigiit kissaatigigaat, nalunaarusiap nutaap takutippaa

Kalaallit Nunaanni iliuutsinut pinerluttuliornerusunut pineqaatissiissutinut innuttaasut isumaat ilimasuutaallu pillugit nalunaarusiami nutaami naalakkersuisut ippassaq saqqummiuppaat. 

Iliuutsit pinerluttuliornerusut tassaasinnaapput hashimik anngiortumik eqqussineq, nakuuserneq, pinngitsaaliilluni atoqateqarneq, meeqqanik innarliineq aamma toqutseriarneq.

Pinerluttuliornerup suussusaanut aalajangersimasumut pineqaatissiineq pinerlisup pineqaatissinneqarneratulli naapertuuttariaqartoq innuttaasut isumaqartut nalunaarusiap ilaatigut takutippaa.

Taamak Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfiup tusagassiutinut nalunaarummi erseqqissasatigaa.

Nalunaarusiap takutippaattaaq, inuit meeqqanik innarliinikut, pinerluttulerinermi inatsimmi ullutsinni atuuttuminngarnit, sakkortunerusumik sivisunerusumillu piuneqaatissinneqartassasut inuiaqatigiit isumaqarput.

Sivisunerusumik pineqaatissinneqarsimasut inissiisarfimmiititsisarnissaq pillugu inatsisissatut siunnersuut

Nalunaarutsiaq Ilisimatusarfimmiit suliarineqarpoq, taannalu ukit marluk suliarineqarsimavoq. Nalunaarusiami inerniliussat siunissami eqqartuussiveqarneq pillugu killiliussat aalajangerneqarnissaannut atorneqassapput.

- Pinerluttulerinermi inatsisip ullutsinnut naleqquttuunissaa aamma innuttaasut naapertuilluartoqarneranik misigisimanissaannut naammassinninnissaa, Naalakkersuisunut pingaaruteqarpoq, Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja Nathanielsen (IA), saqqummiunneqarneranut atatillugu oqarpoq.

Inatsisissatut siunnersuut pineqaatissinneqarsimasut inissiisarfianni piffissami aalajangersimasumi qanoq sivisutigisinnaanera pillugu, pineqaatissiinermi killiliussat sivitsorneqarnissaat Inatsisartuni oktobarip 22-ani aappassaaneerneqassaaq.

Ullumikkut pineqaatissiinermi ukiuni qulini pineqaatissinneqarsimasut inissiissarfianiittoqartarpoq. Piffissaliussap ukiunut 16-inut sivitsorneqarnissaa Naalakkersuisunit siunnersuutitut saqqummiunneqarpoq. 

Siunnersuut Naaja Nathanielsenip nalunaarusiap nutaap saqqummiunneqarneranut atatillugu aamma erseqqissaatigigaa.

- Siunissami eqqartuussiveqarnitsinnut eqqortumik sammivilimmik tamanna alloriarneruvoq aamma pineqaatissiinernik sivisuunerusunik kinguneqarnissaa naatsorsuutigineqartariaqarpoq, ingammik suliani ingasattuni, inunnut navianaatilimmik pinerluttuliornerusuni, taanna tusagassiutinut nalunaarummi oqarpoq.