Paul Watson Nuummi tigummigallarneqaannassasoq
Nunatta Eqqartuussiveqarfiata avatangiisinik illersuiniaq Paul Watsonip tigummigallarneqaannarnissaa aalajangeqqippaa.
Aalajangiisoqaqqammerluinnarpoq, taanna oktobarip ulluisa aappaata tungaanut tigummigallarneqassaaq.
73-inik ukiulik avatangiisinik illersuiniaq umiarsuarminik Nuummi orsernermini tigusarineqarpoq. Ullormilu tassani Eqqartuussisoqarfik Sermersuumi sassartinneqarmat tigummigallarneqarnissaa aalajangerneqarpoq. Aggustillu 15-iani tigummigallarneqaannarnissaa aamma aalajangerneqarluni.
Paul Watsonip aalajangiineq Nunatta Eqqartuussisuuneqarfianut suliarineqaqqitassanngortippaa, tassanngalu maanna aalajangiisoqassaaq. Sassartitsinerni marlunni aamma taamaaliorpoq.
Tigummigallarneqaannarnissaa taassuma tunniunneqarnissaanut apeqqummut aalajangiisoqarnissaata tungaanut najuunnissaanik qulakkeeriniarneruvoq.
Japanip tunniunneqartikkusukkaa
Canadamiu-amerikamiu avatangiisinik illersuiniaq Japanimit nunanut tamalaanut tigusarinneqqussut 2010-meersoq pissutigalugu Nuummi talittarfimmi juulimi ullaakkut tigusarineqarpoq. Danskit politiivi tigusarinninnermut ikiuupput.
Japanimiut arfanniat Sikuiuitsoq Kujallermi arfanniarneranni Watsonip akuliunnerata kingunerisaanik Japanip taanna eqqartuussissutigoortinneqarpaa.
Japanimimi oqartussat avatangiisinut illersuisoq arfanniarnut saassussisimasoraat taakkulu arfanniarniarnerannut akornusiisimasoralugu.
Watsonip tunniunneqarnissaa Japanip Danmarkimut piumasaraa. Tamannalu Inatsiseqarnermut ministereqarfiup aalajangiiffigisussaavaa.
Watsonip tunniunneqarnissani kissaatiginngilaa, taassumalu eqqartuussissuserisuisa tunniunneqarnera EU-mi isumaqatigiissutinik unioqqutitsinerussasoraat.
Sullualukkooriartoraluartoq
Paul Watson japanimiut arfanniat pillugit iliuuseqariartornermini tigusarineqarpoq. Taanna Nuummi orseriarluni Sullualukkoorniaraluarpoq.
Watson Greenpeace-imik pilersitseqataasuuvoq, taannali tassunga ilaajunnaarnikuuvoq, suliniuteqatigiiffimmillu Captain Paul Watson Foundationimik pilersitsisuuvoq.
Video oqallisaasoq eqqartuussivimmi takutinneqartoq
Avatangiisinik illersuiniap, Paul Watsonip illersuisumi eqimattat ullumikkut sassartitsinermi videoliamik takutitsisinnaanissaat neriuutigaa.
Aggustip 15-iani sassartitsinermi eqqartuussisoq tamatuma takutinneqarnissaanut akuersissuteqanngilaq.
Illersuisut oqarnerat naapertorlugu videoliap Watsonimut pasilliutaasut ilarpassui tunngavissaqanngitsut takutippaa.
Eqqartuussisup videop takutinneqarnissaa tamatumuuna akuersissutigigaa Sermitsiaq.AG allappoq. Tusagassiuutit naapertorlugit videomi 4,5 minutsinik sivisussuseqartumi gummibådi umiarsuup tungaanut ingerlalluni qaartartumik tipittuliortitsisartumik aallartitsisoq takutinneqarpoq.
Naalli videoliaq takutinneqaraluartoq avatangiisinik illersuisup aniguisinneqarnissaanut tamanna sunniuteqanngilaq, taannalu taamaalilluni Nunatta Eqqartuussisuuneqarfiata Nunatsinni Eqqartuussiviup aalajangerneranik aalajangersaaginnassappat Nuummi pineqaatissinneqarsimasunut inissiisarfimmi oktobarip aappaanut tigummigallarneqaannassaaq.
