Naalakkersuisoq: Paul Watson nunatsinniiginnassaaq

Naaja Nathanielsenip oqarnera naapertorlugu avatangiisinik illersuiniartup Danmarkimut tunniunneqarnissaa isumassaqanngilaq, eqqartuussivimmimi suliaq nunatsinni suliarineqassammat.

Allattoq Kim Hinrichsen

aggustip 19-at 2024 11:15

Nutserisoq Connie Fontain

Naleqqamit Pele Broberg naalakkersuisut avatangiisinut illersuisumik Paul Watsonimik anisitseqqullugit kaammattuuteqarluni uissuumminartumik tallimanngormat tusagassiuutinut nalunaaruteqarpoq.

Aamma atuarukPaul Watsonip tigusarineqarnera nunarsuarmi kamaatigineqartoq

Taanna tusagassiuutinut nalunaarummi ilaatigut ima allappoq:

- Danskit akisussaaffiannut Inuiaat Kalaallit akunnermiliuttunngortinneqarput. Politiit danskiupput. Justitsiministerie danskiuvoq. Paul Watson qanoq pineqassaneranut danskit aalajangigassaraat.

- Taamaammat Paul Watson Danmarkimut anisinniartigu, Danmarkillu nunartik aqqutigalugu isumaginiarlissuk. Uagut sussagatsigu. Ajornartorsiutissatsinnik pilersitsivallaareernikuuvoq.

Pisariaqanngitsumik kissaatiginanngitsumillu sammineqarneq

Pele Brobergip suliaq nunatsinnik isiginerlutsitsinermik kinguneqalereersoq maluginiagaasa ilagaat:

- Danskit piliaannut uagut - aasit - pisuutitaalluta eqqugaaqqinnginniassaagut, Nunatsinnut piujuaannartitsisumik puisinik arfernillu piniarnerup, avataaniillu isigineqarnitsinnut kingunerluutigingaatsiarnikuusaa, taanna allappoq.

Aamma atuaruk Københavnimi akerliussutsimik takutitsineq: Paul Watson iperagaassasoq erinarsortartut partiillu piumasarigaat

Susassaqarfimmut tassunga akisussaasoq – Naaja Nathanielsen maanna ilannguppoq, Watsonillu nunatsinniiginnarnissaa erseqqissaatigalugu:

- Naalakkersuisut Paul Watsonip Danmarkimut nuutsinneqarnissaanik qinnuteqarnissaminnik isumaliutiginninngillat. Paul Watson nunatsinni tigusarineqarnikuuvoq, taamaammat tassunga tunngatillugu politiini eqqartuussiveqarfimmilu suliaq nunatsinni suliarineqassaaq.

Aamma atuarukPaul Watson Nuummi septembarip tallimaata tungaanut tigummigallarneqassasoq

Paul Watson japanimiut oqartussaasuisa tigusarinnittoqarnissaanik nunanut tamalaanut piumasaqaataat 2012-imeersoq pissutigalugu Nuummi umiarsuarsualivimmi juulip 21-ani tigusarineqarpoq.

Taanna tamatuma kingornali Nuummi tigummigallarneqalerpoq, taassumalu "tunniunneqarnissaanut apeqqummut atatillugu aalajangiisoqarnissaanut nunatsinniiginnarnissaa qulakkeerniarlugu" septembarip tallimaata tungaanut nunatsinniiginnassalluni.

PAUL WATSON NAATSUMIK

Canadami Torontomi 1950-imi decembarip aappaani inunngorpoq.
Avatangiisinik illersuiniaqatigiiffimmik Greenpeacemik 197-imi pilersitseqataasuuvoq. Tassanngali 1977-imi anivoq.
Immap uumasuinik immamilu uumassusillit ataqatigiiaarnerannik illersuiniaqatigiiffimmik Sea Shepherd Conservation Societymik tamatuma kingorna 1977-imi pilersitseqataavoq.
Sea Shepherds pillugit piviusulersaarusiami nangeqattaartumi "Whale Wars"-imi pingaarnertut inuttaasunut ilaavoq.
"Avatangiisinik 1900-kkunni illersuiniallammaat 20-t ilaattut" amerikamiut atuagassiaasa ilaannit Time Magazinemit 2000-mi toqqagaavoq.
Atuakkiai ilaatigut makkuupput: "Ocean Warrior" aamma "Earthforce!", imalu oqaasinnaaqarnini aamma ilisimaneqaatigaa: “If the oceans die, we die” (imarpiit uumassuseeruppata, uagut toqussagut, (aaqq.))

Isumassaqanngitsoq

Tamannali Pele Brobergip allanngortinniarpaa, taassuma Watson danskinit tigummigallarneqartussanngortikkusuppaa.

Inatsiseqarnermulli naalakkersuisup, Naaja Nathanielsenip Paul Watsonip danskinut tigummineqartussanngortinneqarnissaa isumassaqanngilaq.

Aamma atuarukPaul Watsonip tunniunneqarnissaa Japanip piumasarigaa

Tamannami annertuunngortitsillunilu akisussasoq, taanna oqarpoq:

- Danskinut tigummineqarallartussanngortinneqassaguni, inatsisit atortinneqarfiat nunatsinniimmat eqqartuussisoqartussanngorneri tamaasa Danmarkip nunattalu akornanni siumut utimullu angallanneqartassaaq.

Aamma atuarukNunatta Eqqartuussisuuneqarfia: Paul Watson tigummigallagaaginnassaaq

- Taama pisoqarnera tusagassiuutit soqutiginninnerannut annikinnerulersitsinavianngilaq. Taamaammat Naleqqap siulittaasuata Paul Watsonimik danskinut tigummigallarneqartussanngortitsinissamik kissaateqarnera suliap ingerlanerani eqqortinneqarnavianngilaq.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.