Paul Watsonip tigusarineqarnera nunarsuarmi kamaatigineqartoq
#FreePaulWatson
Hashtagip uuma ataani avatangiisinik sukataaruteqartut innuttaasullu nalinginnaasut nunarsuarmi tamalaaneersut Paul Watsonimut tapersiinerminnik sapaatip akunnerata marluk affaani kingullermi takutitsipput.
73-inik ukiulik avatangiisinik sukataaruteqartoq Japanimit tigusarinneqqussut pisoq pissutigalugu Nuummi juulip ulluisa 21-anni tigusarineqarpoq. Japanip oqarnera naapertorlugu Watson inuttanilu avatangiisinut atatillugu iliuuseqarnermikkut Japanimi aalisartut inuunerannut navianartorsiortitsisimapput.
Tamatumalu kingornali nunarsuarmi sumiiffinnit tamalaanit tassunga tapersiisoqaleraluttuinnarpoq.
Inuit 670.000-it Paul Watsonip iperagaanissaanik præsidentip Emmanuel Macronip piumasaqaateqarnissaanut franskit atsiornernik katersititsinerannut atsioqataapput.
Franskit præsidentiat suliamut aamma nammineerluni akuliunnikuuvoq. Nutaarsiassaqartitsivik AFP naapertorlugu Macronip Danmark Paul Watsonimik Japanimut tunniussinnginnissaanik kaammattuuteqarfigaa, præsidentillu "pisut qanimut malinnaaffigai" allassimavoq.
Tamatuma saniatigut franskit politikerit 68-it Europa-Parlamentetimilu ilaasortat danskit ministeriuneqarfianut allagaqarlutik Paul Watsonip iperagaanissaanik oqariartuuteqarput.
Akerliussutsimik takutitsinerit rockinillu nipilersortartut
Politikkikkut suliaqartut kisimik suaaruteqanngillat.
Kulturikkut nunarsuarmi ilisimaneqarluartut arlallit Paul Watsonimut aamma illersuillutik tigusarineqarneranik isornartorsiuipput.
Assersuutigalugu filmiliornermi ilitsersuisoq, James Cameron, rockimik nipilersortartut Pearl Jam aamma erinarsortartoq Bryan Adams sukataaruteqartumut tigusarineqartumut tapersiinerminnik oqariartuuteqarput.
Tamatuma saniatigut nunarsuarmi sumiiffinni arlalinni Paul Watsonip iperagaanissaanik piumasaqartut akerliussutsimik takutitsipput.
Brasiliap illoqarfiani São Paolomi sukataaruteqartut danskit konsulateqarfiata saani akerliussutsimik takutitsipput.
Akerliussutsimik takutitsisut assinganik ilorrisimaarutiginninnatik Dublinimi Irlandimiittumi danskit aallartitaqarfiata saani aamma tyskit illoqarfiini arlalinni soorlu Berlinimi, Bremenimi Stuttgartimilu aamma akerliussutsimik takutitsisoqarluni.
Paul Watson Nuummi pineqaatissinneqarsimasunut inissiisarfimmi aggustip ulluisa 15-iata tungaanut tigummigallarneqarpoq.
Avatangiisinik sukataaruteqartoq Japanimut tunniunneqassanersoq tunniunneqassannginnersorluunniit Danmarkimi inatsiseqarnermut ministereqarfiup aalajangigassarigaa, Kalaallit Nunaanni Politiit paasissutissiipput.
