Nunatta Eqqartuussisuuneqarfia: Paul Watson tigummigallagaaginnassaaq
73-inik ukiullip avatangiisit pillugit ilungersuutillip pineqaatissinneqarsimasunut Nuummi inissiisarfimmi aggustip 15-iata tungaanut tigummigallagaanissaanik Eqqartuussisoqarfik Sermersuup aalajangernera atuutiinnassasoq, Nunatta Eqqartuussisuuneqarfiani aalajangerneqarpoq.
Kalaallit Nunaanni politiit tusagassiorfinnut taama nalunaarput.
Paul Watson avatangiisinik illersuiniaqatigiiffimmik Greenpeacemik pilersitseqataasuuvoq. Taanna umiarsuarmik MV John Paul DeJoriamik Nuummut sapaatiummat tikikkami politiinit tigusarineqarpoq.
Tassa Paul Watsonip tigusarineqarnissaa Japanip oqartussaasuisa nunanut tamalaanut piumasaqarnikuunerat pissutaalluni nunarsuaq tamakkerlugu ujaarineqareerluni nunatsinni tigusarineqarpoq.
Sapaatiummat tigusarineqareernerani Eqqartuussisoqarfik Sermersuumi sassartinneqarmat aalajangerneqarpoq aggustip 15-ata tungaanut tigummigallagaassasoq. Suliarli tamatumunnga tunngasoq Watsonip illersuisuisuata Nunatta Eqqartuussisuuneqarfianut ingerlateqqippaa. Tigummigallagaaginnassasorlu Nunatta Eqqartuussisuuneqarfiani aalajangerneqarpoq, taamaammat Watson pineqaatissinneqarsimasunut Nuummi qaammatip tulliata qiteqqunnerata tungaanut inissiisarfimmiiginnassaaq.
Ukiut 14-it matuma siornali tigusarinneqqusisut
Paul Watson avatangiisinik illersuiniaqatigiiffimmik Greenpeacemik pilersitseqataasuusoq avatangiisinik illersuisut silarsuaanni oqallisaaqaaq. Taassuma japanimiut Sikuiuitsoq Kujallermi arfannialeruttorneranni akornusersuisimasutut pasineqarluni tigusarineqarnissaa, Japanip oqartussaasuisa 2010-mi naalakkiutigaat.
Paul Watson japanimiunik arfannialeruttortunik Japanip oqartussaasuisa oqarnerat naapertorlugu saassussillunilu akornusersuisersuisimasoq, tuluit aviisiisa ilaat The Guardian Paul Watsonip Kalaallit Nunaanni tigusaareernerani allappoq.
Tassa Japanip oqartussaasui Paul Watsonimik ukiut 14-it matuma siornali tigusarinneqqusipput, Paul Watsonili suli Japaniliaanneqarnani.
Paul Watson Japaniliaanneqarnissaminut pinaaserpoq, Japaniliaanneqarpallu tamanna inuttut pisinnaatitaaffiit pillugit Europami isumaqatigiissummik unioqqutitsinerussasoq Japanilu isumaqatigiissummik taassuminnga eqquutsitsinngitsoq taassuma illersuisuisa oqaatigaat.
Paul Watson Japaniliaanneqassanersoq Danmarkip inatsiseqarnermut ministereqarfia aalajangiisussaatitaasuusoq, Kalaallit Nunaanni politiit ilisimatitsipput.
