Avatangiisit pillugit sukataarutilik qaammat ilivitsungajak tigummigallagaassasoq
Avatangiisit pillugit ilungersuutilik canadamiusut amerikamiusullu innuttaassusiliusuusoq Paul Watson Japaniliaanneqassanersoq aalajangerneqartinnagu Kalaallit Nunaanni qaammat ilivitsungajak tigummigallagaassaaq.
Tassa 73-inik ukiulik Paul Watson Japaniliaanneqassanersoq Eqqartuussisoqarfik Sermersuumi aggustip 15-iani aalajangerneqarnissaata tungaanut tigummigallagaavoq.
Paul Watsonip illersuisuisa tamanna nutaarsiassaqartitsivimmut Ritzauimut uppernarsarpaat.
Paul Watsonip Kalaallit Nunaanni illersuisoraa Ulrik Blidorf. Paul Watson aggustip 15-iata tungaanut tigummigallagaassasoq Paul Watsonilu pillugu suliaq Nunatta Eqqartuussisuuneqarfianut ingerlateqqittoq, Ulrik Blidorf KNR-imut oqarpoq. Tigummigallarneqarnissaanut Eqqartuussisoqarfik Sermersuup aalajangernerata Paul Watsonimit Nunatta Eqqartuussisuuneqarfianut suliareqqitassanngortinneqarnera tamatumunnga pissutaavoq.
Paul Watson pineqaatissinneqarsimasunut Nuummi inissiisarfimmi tigummigallagaavoq.
Paul Watson avatangiisinik illersuiniaqatigiiffimmik Greenpeacemik pilersitseqataasuusoq avatangiisinik illersuisut silarsuaanni oqallisaaqaaq. Taassuma japanimiut Sikuiuitsoq Kujallermi arfannialeruttorneranni akornusersuisimasutut pasineqarluni tigusarineqarnissaa, Japanip oqartussaasuisa 2010-mi naalakkiutigaat.
Ukiut 14-it matuma siornali tigusarinneqqusisut
Paul Watson japanimiunik arfannialeruttortunik Japanip oqartussaasuisa oqarnerat naapertorlugu saassussillunilu akornusersuisersuisimasoq, tuluit aviisiisa ilaat The Guardian Paul Watsonip Kalaallit Nunaanni tigusaareernerani allappoq.
Tassa Japanip oqartussaasui Paul Watsonimik ukiut 14-it matuma siornali tigusarinneqqusipput, Paul Watsonili suli Japaniliaanneqarnani.
Paul Watson Japaniliaanneqarnissaminut pinaaserpoq, Japaniliaanneqarpallu tamanna inuttut pisinnaatitaaffiit pillugit Europami isumaqatigiissummik unioqqutitsinerussasoq Japanilu isumaqatigiissummik taassuminnga eqquutsitsinngitsoq taassuma illersuisuisa oqaatigaat.
- Sullitatta iperagaanissaa sorsuutigaarput, Japaniliaanneqarnissaanullu nunamulluunniit allamukaanneqarnissaanut pinaasingaassaagut, Paul Watsonip illersuisuisa ilaat inuttut pisinnaatitaaffinnik aamma illersuisuusoq François Zimeray nutaarsiassaqartitsivimmut Ritzauimut nalunaarummini allappoq.
Tassalu Paul Watson Japaniliaanneqassanersoq Danmarkip inatsiseqarnermut ministereqarfia aalajangiisussaatitaasuusoq, Kalaallit Nunaanni politiit ilisimatitsipput.
Greenpeacemik pilersitseqataasuusoq
Watson Greenpeacemik 1970-ikkunni pilersitseqataasuuvoq, pilersitseqatiniluli tamatuma kingornali attavigiikkunnaarput. Paul Watsonillu periusia akuersaanngilluinnaritsik, Greenpeacep oqaatigisareerpaa.
Watson Greenpeacemik pilersitseqatinilu attavigiikkunnaaramilli illersuiniaqatigiiffiinnik allanik marlunnik, siullermik Sea Shepherdsimik kingornalu Captain Paul Watson Foundationimik aamma pilersitseqataavoq.
