Avatangiisit pillugit sukataaruteqartoq Nuummi tigusarineqartoq
Kalaallit Nunaanni Politiit, Amerikamiusut Canadamiusullu innuttaassusilik Paul Watson, Nuup umiarsualiviani sapaammi ullaakkut tigusaraat. Kalaallit Nunaanni Politiit tusagassiorfinnut nalunaarummi taama allapput.
Paul Watsonip tigusarineqarnissaa Japanimiut piumasaraat, Watsonilu nunarsuaq tamakkerlugu tamanna pillugu ujaarineqarluni.
Paul Watson umiarsuarmut MV John Paul DeJoriamut ilaalluni Nuummut tikimmat ajornaquteqanngitsumik tigusarinnittoqartoq politiit allaaseraat.
Watsonip Eqqartuussisoqarfik Sermersuumi ullumi sapaammi sassartinneqarnissaa pilersaarutaasoq politiit aamma nalunaarutigaat.
"Japanimut tunniunneqassanersoq tunniunneqassannginnersorluunniit pillugu aalajangiisoqarnissaata tungaanut tigummigallarneqarnissaanut piumasaqaatip nalilerneqarnissaata tungaanut" tamanna pissasoq ilaatigut oqaatigineqarpoq.
Inatsiseqarnermut ministereqarfik aalajangiissasoq
Inuit nunani allani eqqartuussivitsigut malersorneqarnissamut tunniunneqarsinnaanissaannut inatsisitigut tunngavissaqarnersoq Danmarkip inatsineqarnermut ministereqarfiata aalajangertarpaa.
Paul Watson, nunatsinni maanna tigusarineqarsimasoq, suliniaqatigiiffimmik Captain Paul Watson Foundationimik pilersitsisuuvoq, immami avatangiisit pillugit suliniuteqartuulluni.
Taanna suliniaqatigiiffimmmik "Sea Shepherd Conservation"-imik siusinnerusukkut pilersitseqataasuuvoq. Suliniaqatigiiffik taanna assersuutigalugu Savalimmiormiut niisarnarniartarnerannik akiuiniarlutik ilaatigut sakkortuuliortutut tusaamanerlugaavoq.
