Københavnimi akerliussutsimik takutitsineq: Paul Watson iperagaassasoq erinarsortartut partiillu piumasarigaat

Avatangiisinik illersuiniaq tigummigallagaasoq Paul Watson iperagaaqqullugu danskit nipilersoqatigiit Mewikkut erinarsortuat, Jonas Bjerre, aamma franskini sakkortuumik nipilersortartuni Gojirakkunni nipilersortartoq, Joseph Duplantier, Danmarkimi ataasinngornermi ullaap-tungaani akerliussutsimik takutitsinermi peqataapput.  

Tamanna Alternativetip tusagassiorfinnut nalunaarutaani nittartagaaniittumi atuarneqarsinnaavoq. Alternativet akerliussutsimik takutitsinermik aaqqissuisuupput.

Akerliussutsimik takutitsineq Københavnimi Christiansborg Slotspladsimi pivoq.

73-inik ukiulik Paul Watson Nuummi juulip 21-ni tigusaavoq, taassuma umiarsuaa "John Paul DeJoria" orserniarluni Nuummut taamani tullappoq.

Umiarsuaq japanimiut Atlantikup avannaani arfanniartut akornusersoriartorlugit ingerlaarpoq.

Watson nunarsuaq tamakkerlugu ujaarineqareerluni nunatsinni tigusaavoq, taassuma japanimiut Sikuiuitsoq Kujallermi arfannialeruttorneranni akornusersuisimasutut pasineqarluni tigusarineqarnissaa, Japanip oqartussaasuisa 2010-mi naalakkiutigaat.

Japaniumiut oqartussaasuisa oqarnerat naapertorlugu Paul Watson arfannianik saassussisimavoq sulinerannilu ajoqusersuilluni.

Japaniumiut Paul Watson nunaminnukaanneqassasoq kissaatigaat, taassuminngalutunniussinissamik Japanip allakkatigut pisortatigoortumik inassuteqarfigisimagaatik inatsiseqarnermut ministereqarfik aggustip aallaqqaataani nalunaarpoq.

Avatangiisinik illersuiniap iperagaanissaanik kissaateqarluni ataasinngornermi akerliussutsimik takutitsinermi peqataasut iloqqasunngorlutik tunngavilersuillutik oqaluttuassasut, Facebookimi aaqqissuussap nassuiaataani allaqqavoq.   

Watson avatangiisinik illersuiniaqatigiiffimmik Greenpeacemik pilersitseqataasuuvoq. Taannali tassunga ullumi attuumassuteqanngilaq. Taanna aamma suliniaqatigiiffimmik Sea Shepardimik tunngaviliisuuvoq.

Paul Watsonip Japaniliaanneqarnissaanik kissaateqarnerup itigartitsissutigineqareernissaanik tunngavissaqanngitsoq, inatsiseqarnermik ministereqarfiup siusinnerusukkut nalunaartigereerpaa.

Paul Watsonip Japaniliaanneqaratarsinnaanera Eqqartuussiveqarfik Sermersuumi sisamanngornermi aggustip 15-ni eqqartuussinermi nalilersorneqassaaq.