Partiit minnerusut USA-mut isumaqatigiissut pillugu: Ernumavugut
![](/sites/default/files/styles/image_934x467/public/article_images/nikolaj.jpg?itok=X_BC-KPV)
Nunatta USA-llu akornanni sapaatip-akunnerata siuliani isumaqatigiissutigineqartoq Inatsisartuni partiit pingasut Atassutip, Partii Naleqqap Suleqatigiissitsisullu tigulluanngilaat.
Isumaqatigiissusiornermi periuseq politikerit ingammik iluaringisimaarpaat.
Naalakkersuisut isumaqatigiinniarnermi ammasumik pissusilersorsimannginnerarpaat oqartussaaqataanerlu maanngaannartinnerarlugu.
- Tamat oqartussaaqataanerat pillugu ernumavugut. Taanna atorneqanngilaq. Naalakkersuisummi Inatsisartuni aalajangigassani pingaaruteqartuni matumanitut ittumi partiit tamaasa ilaatittariaqaraluarpaat, Atassummit, Nikolaj Rosing oqarpoq.
AAMMA ATUARUK USA-p Kalaallit Nunaannut millionilikkaanik tapiissuteqarnera Ruslandimit isornartorsiorneqartoq
Suleqatigiissitsisuniit Tillie Martinussenip suliaq aamma iluarisimaanngilaa.
- Suliap ingerlanneqarnera toorlappaluttorujussuusoraara. Danskit naalakkersuisuisa Naalakkersuisullu suliaq akuerisassaanngitsumik kukkusumik suliaraat.
Taassuma amerikamiut Danmarkimi aallartitaata, Carla Sandsip nunatsinnut aningaasatigut tapiissuteqarnissamik suliaqartoqarnerarlugu Twitterikkut aviisimi allaatigisamik siammarterinera erseqqissaatigaa.
Tamanna Naalakkersuisut pisortatigoortumik nalunaaruteqannginneranni pivoq.
- Naalakkersuisugut nalunaaruteqanngitsut amerikamiut aallartitaata tweeterikkut saqqummiussimmat tamat oqatussaaqataanerat ilungersortinneqarpoq, taanna KNR-imut oqarpoq.
Partii Naleqqamit, Pele Brobergip nunatta USA-llu akornanni sooq isumaqatigiissuteqartoqarnera paasisinnaanngilaa.
- Aningaasat uatsinnut (Kalaallit Nunaannut aaqq.) tunnganatik, amerikamiut sulisuinnut tunngapput. Taakku qanoq tapiutaassanerat qanorlu iluaqutaassanerat naluarput, Pele Broberg oqarpoq.
Siunnersortinut aningaasat
USA 12,1 millionit dollarsinik – tassa 83 millionit koruunit missaannik nunatsinni aatsitassaqarnermut, takornariaqarnermut ilinniartitaanermullu aningaasaliiniartut Naalakkersuisut apriilip ulluisa 23-anni, sisamanngornermi uppernarsarpaat.
Isumaqatigiissutilli annikitsortai suli tamanut saqqummiunneqanngillat. Aningaasat siunnersuinermut amerikamiullu suliniutaannut atorneqassasut ilisimaneqarpoq.
AAMMA ATUARUK Kim Kielsen: USA-p aningaasaliissutitik namminneq aqussavaat
Aningaasalli amerikamiut siunnersuisartuinut atorneqaratik assersuutigalugu kalaallit peqqinnissaqarfianut toqqaannartumik atorneqannginnissaat Suleqatigiissitsisut Atassutillu eqqarsarnartoqartippaat.
- Naalakkersuisut qanoq isumaqatigiissuteqarsimanertik qularutigerpaluppaat. Aningaasanut inatsisitsinni susassaqarfiit sisamat aningaasatigut aallaqqaammut tapiiffiginiarneqarpalukkaluarput. Siunnersortinilli tapiiffigineqaannalersugut paasinarsivoq.
- Tassa imaappoq Naalakkersuisut siutaannut nunatsinni qanoq ingerlatsissanersugut amerikamiut isussuutigisassavaat. Tamanna ernumanartoqartingaatsiarparput, Nikolaj Rosing oqarpoq.
KNR Siumumit oqaaseqartitsiniarsarivoq, oqaaseqartinniarneralli iluatsissimanngilaq.