USA-p Kalaallit Nunaannut millionilikkaanik tapiissuteqarnera Ruslandimit isornartorsiorneqartoq

USA-p Kalaallit Nunaannut 82 millionit koruuninik tapiissuteqarniarnera Ruslandip Danmarkimut aallartitaanit isornartorsiorneqarpoq.

Ruslandip Danmarkimut aallartitaa Vladimir V. Barbin aviisimut Politikenimut emailimi ima ilaatigut allaaserisaqarpoq:

- Issittumi pissutisit pillugit ammasumik oqaloqatigiinnerit suleqatigiinnerillu pinnagit USA akeqqersimaarniartutut pissusilersorpoq, Issittumi oqaasissaqartuunissani USA-p anguniarsaraa, aallartitaq Vladimir V. Barbin oqarpoq.

Barbin isumaqarpoq USA-p tapiissuteqarnermigut Issittumi pissaanermik oqimaaqatigiinneq sunnerniarsarigaa.

AAMMA ATUARUK Nunarput USA-lu koruuninik millionilikkaanik nalilinnut suleqatigiissasut

Ilulissani 2008-mi isumaqatigiissut akerlianik USA pissusilersortoq Barbin isumaqarpoq, Issittup eqqississimaffiunissaa nunat Issittumut killeqarfillit tallimat taamanikkut isumaqatigiissutigimmassuk.

- Rusland pissutsit pingaaruteqartut assigiinngitsut pillugit USA-mik oqaloqateqarnissamut isumaqatigiissusiornissamullu piareeqqavoq, Ruslandip Danmarkimut aallartitaa oqarpoq.

Ruslandilli aallartitaata isornartorsiuinera USA-p Danmarkimut aallartitaanit Carla Sandsimit sakkortuumik illuatungilerneqarpoq.

Ruslandip Kinallu Issittumik soqutiginninnerujussuat Sandsip aviisimi aallaatigisami sapaatip-akunnerata siuliani mianersoqqussutigaa. Issittumili eqqissisimasoqarnissaa USA-p soqutigisarigaa, Carla Sandsip Politikenimi allaatigisami oqaatigaa:

- Issittup aalaakkaallunilu isumannaatsuunissaa anguniagaraarput, akerleriittoqarani, namminersortuunerup ataqqineqarnissaa, aningaasarsiornermilu, ilisimatuussutsikkullu suleqatigiinnerit, avatangiisillu pillugit unammilligassat eqqarsaatigalugit, Carla Sands oqarpoq.