Partiit billetsit akikinnerit pillugit: Allanngortinneqarsinnaasariaqarput

Danmarkimut nunamulluunniit allamut billetsisisimaguit nunattaluunniit iluani angalaannarusullutit taamaaliorsinnaasariaqarputit.

Naalakkersuisooqatigiinnut ikorfartortaasut Demokraatit, taavalu Partii Naleraq aamma Inuit Ataqatigiit taama isumaqarput.

Air Greenlandimik atuisut arlallit billetsiminnik allannguisinnaanatik ilisimatinneqarsimanerisa kingorna taama isummerput.

-Ajuusaarnarpoq

- Soorunalimi ajuusaarnartorujussuuvoq taamatut inissinneq, Demokraatini siulittaasuugallartoq Nivi Olsen (D) oqarpoq.

Politikerit aktianik piginneqatigiiffiit akuleruffiginissaat mianerissagaat akuliutinnginnissamillu periaaseqarneq puigorneqassanngitsoq taassuma erseqqissarpaa. Maannakkulli coronavirusip ajornartorsiortitsinerani politikerit isummernissaat pingaaruteqartoq ilanngullugu oqarpoq.

AAMMA ATUARUK Nivip billetsini utertissinnaanngilaa: Ilungersunaqaaq

Taassuma Danmarkimut angalanissamut billettit nunatsinni angalanissamut allanngortinneqarsinnaanngortinnissaat partiinut allanut kaammattuutigaa.

Air Greenlandimi maajip 31-iata kingorna angalasussatut 'aappaluttumik' billettisisimagaanni angalanissamut ulloq allanngortinneqarsinnaanngitsoq aningaasalluunniit utertinneqarsinnaanngitsut, Air Greenland ilisimatitsivoq.

Inuiaqatigiinnut pitsaanerussasoq

Inuppassuit nualluut coronavirus pissutigalugu angalanissartik nalornissutigalugulu ernummasut, KNR-ip oqaloqatigai.

Danmarkimut angalaniarunnaarluni Nunatsinni angalaannarnissaq periarfissaasariaqartoq aningaasalluunniit utertissinnaasariaqartut Partii Naleraq isumaqarpoq.

AAMMA ATUARUK Air Greenland atorfinnik 75-100-nik atorunnaarsitsisoq

- Ujartorparput immaqa suliffeqarfinnut ataasiakkaanut iluarpallaanngikkaluartoq kisianni inuiaqatigiinnut pitsaanerusoq tassa aningaasartai utertissinnaanissai, Pele Broberg oqarpoq.

Taassuma Namminersorlutik Oqartussat inuussutissarsiortunut assigiinngitsorpassuarnut ikiorsiissusiinera eqqaasitsissutigaa. Taamaammat inuit napparsimaleratarsinnaasuugunit taammaanngikkunilluunnit pissarsissutiginngisaminnik aningaasartuuteqarsimasut utertitsisinnaanissaat qulakkeerneqartariaqartoq, taanna isumaqarpoq. Aningaaasanik utertitsisut taamaalillutik aningaasat nunatsinni atorsinnaagaat, taannaa neriuppoq.

Akisoorujussuussaaq

Billettiminnilli utertitserrappata Air Greenlandimut akisoorujussuussaaq.

Tassami Air Greenland coronavirusimik eqqugaangaatsiarmat, allaat atorfinnik 75-100-nik atorunnaarsitsivoq.

- Ullumikkut aningaasat utertikkusussanngippassuk takorloorneqarsinnaagami kingusinnerusukkut inuit pisisarunnaarsinnaasut. Taamaammat massakkut annaasassaat kingusinnerusukkumut nikisinniaannarnerannut taanna malinnaaffigineqarsinnaalluni, Pele Broberg oqarpoq.

Air Greenlandimi atuisut qanoq politikerinit ikiorserneqarsinnaanersut misissorneqartariaqartoq, Inuit Ataqatigiit isumaqarput.

- Air Greenland nunatta massakkut tamakkiisumik pigivaa. Taamaammat tamakkiisumik oqartussaassuseqarneq inuiaqatigiittut pigivarput. Taamaammat periarfissaq taanna atorusunnerlugu atorusunnginnerluguluunniit naalakkersuisut aalajangigassarivaat. Naalakkersuisut isummersinnaannginnerat inuiaqatigiinnut isasoorutaasariaqanngilaq. Taamaammat aalajangiisoqartariaqarpoq periarfissarlu ammaallugu, Aqqaluaq B. Egede (IA) oqarpoq.

AAMMA ATUARUK Coronakrise: Air Greenland lukker ruter og aflyser afgange

Aningaasaqarnermut Akileraartarnermullu Ataatsimiititaliami siulittaasoq Hermann Berthelsen (S) oqaaseqarfigerusunngilai.

Taannali Danmarkimut angalaniarunnaartunut nunatsinni angalanissaannik kaammattuivoq.

Inuit qassit billettinik utertinneqarsinnaanngitsunik pisisimanersut KNR-ip Air Greenlandimut apeqqutigaa. Tamannali Air Greenlandip akisinnaanagu nalunaarutigaa.

Attaveqaqatigiinnermut naalakkersuisoq Karl Frederik Danielsen (S) KNR-imit ataasinngormalli oqaaseqartinniaraluarparput, tamannali suli iluatsinngilaq.