Parnaarussivissaq suliffissarpassuarnik pilersitsisinnaavoq
Parnaarussivissap 347 millioner koruuninik akeqartussap sanaartorneqarnissaanik Nunatsinni sanaartornernik suliaqartussatut toqqagaasaut, taama nalunaaruteqarput.
Nuummi parnaarussivissamik sanaartortoqarnissaanik eqqarsaat, Folketingimit 2010-mili akuersissutigineqarmat ukiut tallimat qaangiutillartullu kiisami parnaarussivissarsuarmik suliffeqarfiit kikkut sanaartortuussaanersut toqqarneqarput. Taama allaaserisaqarpoq sanaartorneq pillugu atuagassiaq, Licitation.
AAMMA ATUARUK Nunatsinni parnaarussivissaq pingasunik immikkoortortaqarfeqassaaq
Parnaarussivissamik suliffeqarfiit sanaartortussat tassaassallutik Permagreen, HJ-TEK aamma Arsarnerit A/S, taakku suliffeqarfiit tassaapput sanasut, ruujorilerisut innaallagissamillu ikkussuisartut.
Suliffissanik pilersitsisoqarnissaanik suliffeqarfiit isumalluarput. Agguaqatigiissillugu suliffissanik 44-t angullugit pilersitsisoqarnissaa suliffeqarfinnit ilimagineqarluni.
Parnaarussivissarsuarmilli sanaartortussatut ilumut suliffeqarfiit taakku suliakkerneqassanersut suli iluamik inissivinneqanngilaq, tamannami aatsaat piviusunngorsinnaavoq, suliffeqarfinnit sanaartornermik qinnuteqartunit akuerisaanngitsunilli tamanna naammagittaalliutigineqanngippat. Aamma Folketingip aningaasaqarnermut ataatsimiititaliaata aningaasaliinermut isumaqatigiissut pisortatigoortumik akuerippagu, Nunatsinni suliffeqarfiit snaartorlutik aallartissinnaasut, Permagreenip pisortaa, Preben Kold oqarpoq.
AAMMA ATUARUK Nuummi parnaarussivissaq qanoq isikkoqassanersoq unammissutigineqalerpoq
Permagreenimi betonilerisut sanasullu ukiunut marlunnut agguaqatigiissillugu 30-niik 35-it angullugit isumaqatigiissusiorfigineqarlutik sulisorineqarsinnaasut, pisortap oqaatigaa.
Ruujorilerisunit, HJ-TEK-imit ilimagineqarluni sanaartornerup tamakkiisup nalaani pingasunik sulisoqarsinnaanissaq. Innaallagissanillu suliaqartut, Arsarnerit ilimagaat innaallagissanik suliaqartut sisamaniit arfinillit angullugit 2016-imi 2017-imilu sulisorineqarsinnaanissaat.
Suliffissalli taakku ilimagineqartut aatsaat piviusunngorsinnaapput parnaarussivissamik suliaqarnissamik pilersaarutit maannamiit ukiullu tulliuttut marluk ingerlanerani allaanngortinneqanngippata.
Parnaarussivissarsuup suliarineqarnera aallartissaaq sapaatip akunnerani uani naammagittaalliorfissatut ulluliunneqarsimasoq qaangiuppat taamatullu sanaartornissaq pillugu isumaqatigiissutit atasiorneqareerpata.
