Nunatsinni parnaarussivissaq pingasunik immikkoortortaqarfeqassaaq

Nunatsinni parnaarussiviit siullersaat 2017-imi naammassisussaq Nuullu Kangerluanut isikkiveqartussaq, 350 million koruuninillu akeqartussaq atulerpat, parnaarussivik pingasunik immikkoortortaqassaaq. Matoqqasoq parnaarussanut 40-nut inissalik, pinerlussimasunut inissiisarfik ammasoq, tassa ullumuikkutut ittoq 36-inut naammattoq aamma parnaarussaareernerup kinguneranik inuiaqatigiinnut ilaalernissamut piareersarfik.
decembarip 16-at 2013 08:12

Nuummi parnaarussivik 2017-imi atulerpat, kalaallit Danmarkimi Hersted Vesterimi parnaarussaasut Nunatsinnut nuunneqarnissaat siunertaasoq, Nunatsinni Pinerluttulerinermi Isumaginnittoqarfiup pisortaata, Hans Jørgen Engbo-p oqaatigaa.

- Hersted Vesterimiipput kalaallit parnaarussat 25-it missaanniittut, taakkulu Kalaallit Nunaanni Eqaartussivinnit pineqaatissinneqartuullutik. Siunertaavoq parnaarussivik Nuummiittussaq naammassippat 2017-imi taakku nuunneqassasut, Hans Jørgen Engbo oqarpoq.

Nunatta parnaarussivissaa siulleq pingasunik immikkoortortaqarfeqartuussaassasoq Hans Jørgen Engbo-p oqaatigaa.

- Parnaarussivittavissaa pillakkanut 40-nut inissaqassaaq aamma pinerlussimasunut inissiisarfik ammasoq 24-nut inissalik tassaniissaaq. Taakku saniatigut parnaarussaaqqanerup naammassilernerani parnaarussat inuiaqatigiinnut pitsaasumik ilaalernissaat siunertaralugu sungiusarfittut taaneqarsinnaasoq immikkoortat pingajorissavaat, Hans Jørgen Engbo oqarpoq.

Nuup Kangerluanut isikkivilerlugu parnaarussivissaq, 8.000 kvadratmeterisut angitigisussaq aalajangerneqarmalli Nuummi innuttaasunit tamanna iluarineqarani naammagittaalliutigineqartarpoq ilaatigut atsiornernik katersinikkut.

- Ukiukkut sisortarfiit qamuteralattarfiillu parnaarussivik aqqutaaniittussatut aalajangerneqarmalli tamanna Nuummi innuttaasunik isornartorsiorneqartarpoq. Tamannalu pillugu Kommuneqarfik Sermersooq oqaloqatigisarparput, qanoq iliornikkut innuttaasut piumasaat aalajangerniarnermi ilaatinneqassanersoq oqaloqatigiissutigalugu.

Nunatsinni Pinerluttulerinermi Isumaginnittoqarfiup pisortaata, Hans Jørgen Engbo taama oqarpoq.