Panertut tarajortikkallu kalaalimineerniarfinni tuniniarneqarsinnaalersut
Naalakkersuisut suliassaqarfiit inuussutissalerisut pillugit nalunaarut immikkut akuersinermut tunngasoq aggustip ulluisa 30-anni akuersissutigaat, inuussutissat suliarineqarsimasut ilaat, assersuutigalugu aalisakkat neqillu panertut, neqillu nakkutilliisunit misissorneqaqqaartartussaajunnaarsinneqarlutik. Namminersorlutik Oqartussat tusagassiutinut taama nalunaaruteqarput.
Allattoq Anton Gundersen Lihn
septembarip 04-at 2018 08:13
Nutserisoq Mads Lynge
Aalisakkat neqillu panertut, aalisakkallu neqillu qerisut, aalisakkallu neqillu tarajortikkat, aalisakkallu neqillu pujuukkat, immikkut akuersinerup kingunerisaanik nerisassat suliarineqarsimasut kalaalimineerniarfinni tunisaalersinnaapput.
- Nuannaarutigeqaara piniartut aalisartullu piliaminnik annerusumik kalaalimineerniarfinni tunisisinnaalissammata, taamaalilluni kalaalimerngit amerlanerit tunineqartalersinnaassallutik, Aalisarnermut Piniarnermut Nunalerinermullu naalakkersuisoq Erik Jensen oqarpoq.
Immikkut akuersissuteqarneq ukioq manna septembarip aallaqqaataanit 2019-ip naanissaata tungaanut atuutissaaq.