Palle Jerimiassen politikkimi suliunnaartoq
Avannaata Kommuniani borgmesteri, Palle Jerimiassen politikkimi sulinerminik unititsilerpoq. Taanna nammineerluni Facebookkimini qinersinerup unnuaani taama allappoq. KNR-ip paasinninnera malillugu taassuma angusani naammagisimaanngilaa.
Palle Jerimiassen Ilulissani qinersinerup inernerisa saqqummiunneqareerneranni inoqatinut attaveqaammini ima allappoq:
Itisiliiumanngitsoq
KNR-ip Palle Jerimiassen sooq qinikkatut atuukkunnaarniarnersoq pillugu apersorusullugu attaveqarfigaa. Taassumali nassuiaanissaminut itisiliinissaminullu periarfissiissut maanna atorusunngilaa. Tassa qinikkatut atuukkunnaarniarnini pillugu oqaaseqarumanngilaq.
Sooq qinikkatut atuukkunnaarniarnerluni sapaatit akunnerata tulliani nalunaaruteqassalluni taamaallaat ilisimatitsivoq.
Taamaattumik Palle Jerimiassen qinikkatut qaqugu atuukkunnaarniarnersoq, siunissamilu sulerilersaarnersoq suli nalunarpoq.
Qinersisikillingaatsiartoq
Borgmesteri kommunimut marlunngormat qinersinermi 104-inik taaguunneqarpoq. Tamanna 2021-imi qinersinermi angusaanut sanilliullugu pitsaannginneroqaaq. Taamanikkummi pingasoriaat sinnerlugu, tassa 338-nik qinerneqaraluarpoq.
Palle Jerimiassen kommunimut 2021-imi qinersinermi Siumut tunuliaqutaralugu qinigaangaluarpoq. Sulili inissitsiteratik attaviitsunngorpoq. Ukiunilu sisamanngulersuni taama atuutereerluni Demokraatinut 2025-imi februaarimi ilaasortanngorpoq.
Palle Jerimiassen kommunimi qinikkatut ukiuni qulikkaani arlalinni atuuppoq. Ilulissat Kommunerisimasaani, Qaasuitsup Kommunerisimasaani maannakkullu Avannaata Kommuniani qinigaaffiit kingulliit arlallit ataannartumik ilaasortaaffigai.
