Sisimiuni nuna sajuttoq

Sisimiuni nuna tallimanngornerup unnuaani sajuppoq. Tamanna innuttaasut arlallit allassimagaat tallimanngornermi ullaakkut takuneqarsinnaavoq.   

Nuna qanoq sajutsigisimanersoq ilisimaneqanngilaq, ajoqusertoqarsimaneranilli politiit pigaartui nalunaarfigineqarsimanngitsut politiit oqarput.  

Arctic Circle Racep aallartinnissaanut aqaguttoq nuna sajuppoq.

Tassani unamminermi peqataasussat 229-usut ilaasa 160 kilometerisut takigisoq ingerlaarfigissavaat.

Tamanna Arctic Circle Racemut qanoq sunniuteqassanersoq paasiniarlugu aaqqissuisut KNR-ip attaveqarfiginiarsarai.

Misigisaq nalinginnaasoq

Nunap sajuttarnera Kalaallit Nunaanni nalinginnaasuuvoq. GEUS-ip nunap sajunneri arlallit ukiut tamaasa nalunaarsortarpai, pingaartumik Tunumi. Amerlanerilli sakkukingaartarmata malugineqarneq ajorput.

GEUS-ip uuttuinera naapertorlugu Sisimiuni nunap sajunnera 1,6-usoq Richterskalami uuttorneqarpoq.  

Sisimiuni nunap sajunnera annikikkaluartoq sakkortuutut misiginarpoq. GEUS-imi Geofysik og Sedimentære Bassinerimi immikkoortortami ilisimatusartuuneq Tina Larsen naapertorlugu, Kalaallit Nunaata geologiia tassunga peqqutaavoq.

– Kalaallit Nunaat kusanarluinnartumik, kisianni nunap sannaa immikkuullarissuuvoq. Tassa imaappoq sajunnerit annikillinatik siaruaattarput, taanna nassuiaavoq.

Taamaakkaluartoq ernumassutissaqanngitsoq Tina Larsen erseqqissaavoq.

– Nunap sajunnera ernumassutigineqartariaqanngilaq. Nunalli sivikitsukullammik sajunnera pinngortitami pisoq immikkuullarissuuvoq.

Arctic Circle Racemut peqataasut aamma ernumasariaqanngillat.

– Nunap sajunnera ujakkaartunut sunniuteqarnissaa ilimagivallaanngilara, Tina Larsen oqarpoq.