Nunatta avannarpasissortaani nunaqarfinni sapaatini akunnerni marlunni qulimiguuleqanngitsoq

Naqqiissut: Ilanngutassiami siusinnerusukkut Air Greenlandip KNR-ip saaffiginnissutaa uterfigineqarsimanngitsoq allassimagaluarpoq. Tamanna eqqortuunngilaq. Air Greenlandili paasissutissiissuteqarfinnaaleruni akissuteqarniarluni akissuteqarsimavoq. Tamanna aaqqinneqarpoq, KNR-illu kukkuneq ajuusaarutigaa.

Nunatta avannarpasinnerpaartaani nunaqarfimmi Qanaallu eqqaani nunaqarfinni qulimiguulimmik – nunaqarfinnut aqqutissatuaasumik sapaatini akunnerni marlunni takusaqartoqanngilaq.

Tamannalu innuttaasunut kingunerluuteqartoq, innuttaasut arlallit KNR-imut maanna oqaatigaat.

Innuttaasunut ilaatigut inuunermut pingaaruteqartunik nakorsaatinik atuisunut, taakkumi amigaataasut nunaqarfimmi innuttaasoq aterminik saqqummersitserusunngitsoq allappoq.

Maassannguaq Oshima qulimiguullip angalaqqinnissaanut utaqqisut ilagaat. Taanna Qaanaamit sapaatini akunnerni aallarneq ajuleqqavoq, taannalu arfininngorpat kiisami angerlaqqinnissaminut qilanaarpoq.

- Angalanissat taamaatinneqaqattaarnerat qasunarpoq. Aamma taama avinngarusimatigisumi najugaqarluni qulimiguulimmik tamaani uninngasoqannginnera toqqissisimananngeqaaq.

- Assigiinngitsunik kinguneqarpoq. Suliassat assigiinngitsut tamarmik kinguarput. Pilersaarutaagaluit. Taavalu taamaattoqaraangat sulinerup tungaatigut aamma eqquisaqaaq, aningaasarsiassaagaluit annaaneqartaramik.

KNR-ip Air Greenland attaveqarfigaa, tassanngalu paasissutissiisinnaalerunik uterfigeqqinniarluta paasissutissiipput, Qaanaalli eqqaani qumiguulimmik apriilip qeqqani angallassisinnaaleqqinnissaata tungaanut Upernavimmiit timmisartuussinissamut pilersaarutit malillugit timmisartuussisinnaanissartik naatsorsuutigaat.