Palle Jerimiassen attaviitsuujunnaartoq

Palle Jerimiassen ukiuni arlalinni attaviitsooreerluni Demokraatinut ilaasortanngorpoq.

- Demokraatit politikkimi eqqarsartarninni qaninnerpaavakka, Palle Jerimiassen oqarpoq.

Avannaata Kommuniani borgmesteri 2021-mili attaviitsunngorpoq. Demokraatinulli ilaasortanngorniarluni aalajangernermini attaviitsuujunnaarpoq.

Borgmesteri Demokraatinut ilaasortanngorluni facebookkimini sisamanngornermi nalunaarpoq, taassumalu tamanna KNR-imut oqaasertalerneruaa.

- Demokraatit toqqarnerannut tunngaviuvoq, uannut politikkikkut eqqarsartaatsikkut massakkut inissisimaninnut qaninnerpaajupput, Palle Jerimiassen KNR-imut oqarpoq.

Taanna kommunimut apriilip aallaqqaataani qinersinissami qinigassaajumaarluni ilisimatitsivoq.

- Massakkut aalajangernera tunngavigalugu toqqissillungalu oqiliallaqaanga. Aamma qilanaarpunga qineqqusaarnissannut, taanna oqarpoq.

Tikilluaqquneqartoq

Demokraatit siulittaasuata Jens-Frederik Nielsenip, suleqatitaani partiip Facebookimi qupperneratigut aamma tikilluaqquaa.

- Palle Avannaata Kommuniani Borgmesteritut suleqatigiinnermik katersuuffiusumik pilersitsinikuuvoq. Anersaaq tamanna suli inerisaaffigeqqinnissaanut tunuliaqutatut tapersersuissaagut, Jens-Frederik Nielsen allappoq.

Palle Jerimiassen qinigaaffik tamangajaat attaviitsuuvoq. Qinersinissaq qanillimmat attaviitsutut qinigaasinnaanini aarlerigalugu partiimut ilaasortanngornersoq KNR-ip aperaa.

- Naamik taanna tunngaviunngilaq. Uani tunngaviuvoq ingerlariaqqikkusukkama, aammalu alloriaqqikkusukkama taava taanna aalajangerneq tigunikuuara.

- Parteeqarnani ingerlariaqqinnissaq massakkut Kalaallit Nunaanni partiit ingerlariaasii malillugit, systemi taamaatsillugu isernissaq immaqa ajornakusoorsinnaavoq aamma immaqaluunniit ajornarpoq.

Aalajangerneq ajornakusoortoq

Palle Jerimiassen kommunit avannarlersaani qinigaaffinni marlunni kingullerni borgmesteriuvoq. Siullermik Siumumut ilaasortatut maanna attaviitsutut Demokraatinullu ilaasortatut.

Palle Jerimiassenip Inuit Ataqatigiit, Atassut, Naleraq Demokraatillu attaviitsuulluni borgmesteriunermini tunuliaqutarai. Taakkualu tamaasa suleqatigilluarnikuugamigit partiimik ilaasortaaffissaminik aalajangiiniarnini ajornarsimasoq aamma oqaatigaa.

- Aalajangerniarneq qanoq oqassaanga, oqimaannikuuvoq. Ukua partiit sisamat tunuliaqusersuinikut uanga borgmesteriunerma nalaani qanittuaqqamik tamaasa suleqatigigakkit qanittuaqqamillu tatigeqatigiinneq annertooq ingerlannikuullutigu.