Palle Jerimiassenip borgmesterinngoqqinnera Uummannarmiut pakatsissutigisorujussuugaat

Uummannarmiu Sakio Fleischer tallimanngornerup unnuaa ilanngullugu Avannaata Kommuniani borgmesterissatut amerlanerussutilinnit tunuliaqutserneqarpoq.
Aalisartoq piniartorlu, 62-inik ukiulik Rasmus Malakiassen, nunaqqatimik borgmesterinnguleraluarnera tusaramiuk isumalluaammersimagaluarpoq. Assi © : Malik Brøns / KNR
maajip 14-at 2021 18:08

Avannaata Kommuniani suleqatigiilersut attaviitsoq Palle Jerimiassen, Inuit Ataqatigiit, Naleraq, Atassut aamma Demokraatit unnuaq marlunut qiteqquttoq, tassa inissitsiterfiusumik ataatsimiinnissap aallartinnissaa nalunaaquttap akunneri arfineq pingasuinnanngortut suleqatigiinnissaminnik atsioqatigiipput.

Sakio Fleischerillu kommunimi siuttunngunngitsoornera pakatsissutigineqaqaaq.

 

Assi © : Malik Brøns / KNR

 

- Assorujussuaq pakatsivunga, kisimiinngilanga aamma uiga pakatserujussuarpoq. Pakatsinarnermut, eqqarsaatigissagaanni Ilulissat kisimi piorsarneqarnikuuvoq, Aaqa Jensen 28-inik ukiulik KNR-imut taama oqarpoq.

Taassuma Sakio Fleischerip borgmesterinngornissaa isumalluarfigisimagaluaqaa. Uummannami aqquserngit pitsaanerulernissaat inissianik illunillu sanaartortoqarnerunissaa aamma ilimagisimagaluarlugu.

- Uummannarmiumik borgmestereqaleraluarutta imaluunniit Uummannarmiuunngikkaluarluni Upernavimmioq, soorlu taakku eqqarsaatigissagaanni taava eqqarsarnaraluarami taakunamiuni arlaannik borgmestereqalerpat avannaa tamarmi piorsarneqarnissaa. Taanna assorujuk eqqarsaatiginartaraluarpoq, Aaqa Jensen taama oqarpoq.

"Naammagittaalliorniaannarlunga naammagittaalliornianngilanga"

Aalisartoq piniartorlu, 62-inik ukiulik Rasmus Malakiassen, nunaqqatimik borgmesterinnguleraluarnera tusaramiuk isumalluaammersimagaluarpoq. Atsioqatigeereeraluartulli Palle Jerimiassen amerlanerussutilinnit tunuliaqutserneqartoq radioaviisimi ullaaq tusaramiuk pakatserujussuarsimalluni oqarpoq.

 

Assi © : Malik Brøns / KNR

 

- Tassami ukiuni kingullerni oqartariaqarpunga eqqortumik oqassaguma kommuniluunniit ataatsimiititsineq ajorpoq, isumasiuineq ajorpoq, suliaalluunniit sumut killittut nalulernikuuagut. Nassuiaanneqarneq ajoratta oqaluttuunneqarnerluunniit ajorpugut. Naammagittaalliorniaannarlunga naammagittaalliornianngilanga eqqortumiguni oqaluttunga, Rasmus Malakiassen taama oqarpoq.

Taassuma Sakio Fleischer borgmesterinngussagaluarpat piumasaqarfigissallugu eqqarsaatigereersimagaluarpaa.

- Ukiorpaalukasinni ningittakkanut neqitserfiusiusinnaasumik Uummannap kangerluani soqanngilaq, ataasiaratalu eqqaasarlutigu taamaattumik peqartitaalernissarput. Tamakkua imaluunniit taamak ittumik piviusunngortoqarnissaa uanga assut eqqarsaatinniikkaluarami piumasaqaatigissallugu borgmesterinngussappat Sakio Fleischer, Rasmus Malakiassen oqarpoq.

Jokum Zeeb Uummannami SIK-ip immikkoortortaqarfiani siulittaasoq aamma tupaqqavoq toqqissisimananilu.

 

Assi © : Malik Brøns / KNR

 

- Radioaviisi ullaaq tusarakku tupappunga aamma taamannak pisoqarsimaneranut. Kisianni ippassaanikkunni Qanoruukkut tusarparput suleqatigiinnissaagaluaq tunuartikkaat annertunerusumillu tusagaqarata. Ullaaq tusarakku assut tupannarpoq, taamatut ullormiit ullormut aalajangerneq.

- Qinersisartutut toqqissisimanarpallaanngilaq ullormiit ullormut aalajangeeriasaarnerit.