Avannaata: Atassut anivoq Naleraq isumalluarpoq
Atassut Avannaata Kommuniani Siumumik suleqateqarnianngilaq. Atassut isumaqatigiinniarnernit anivoq.
- Kaffi siulleq taanna usserneriinnaani paasereerparput suleqatigiissinnaaneq ungasittupilussuusoq, Atassutip siulittaasua, Aqqalu Jerimiassen KNR-mut sisamanngornermi ualisoq oqarpoq.
Taassuma isumaqatigiinniarnermi aqutsisuusut, tassa Siumukkut, pingasunngornermi naapippai.
Atassut: Ungasippallaaqaagut
Illua-tungerisanilu isumaqatigisinnaannginnamigit suleqatigiissinnaannginnertik naapinneq siullermi nalunaarutigaa. Tassalu Atassut Siumumik suleqateqarnianngilaq.
- Taamannak paasineqarsinnaavoq.
- Uagummi isumaqatigiissutit ukua naaperiutigisaat takusinnaareerpagut uatsinninngaanniit ungasippallaareertut, taanna oqarpoq.
Siumut allannguingaatsiarusuttoq
Aqqalu Jerimiassenip oqarnera naapertorlugu Siumup naaperiutigigaluagaasa ilaat tassaapput inoqqortussuseq aallaavigalugu sanaartugassanik aningaasaliisarnerup atorunnaarsinnissaa missingersuutillu ukioq mannamoortut, siorna ukiakkut akuerineqareersut, allanngortinneqarnissaat.
Missingersuutillu allanngornissaat Siumumeersup, Lars-Erik Gabrielsenip, qineqqusaarnermini oqaatigisareerpaa.
Naleqqamut kaffi sukkoqarluarnerusoq
Naleqqamiilli allatut isumaqartoqarpoq. Taakkua kaffisoqatigiinneq siulleq iluarisimaarpaat. Isumaqatigiinniarnissanullu peqataassapput. Naleraq Siumumik suleqateqarluni Avannaata Kommuniani suleqatigiiliornissamut periarfissaqarpoq.
- Assigeequtigut assigiinngitsut, assigiinngequtigut pinerunagit, assigeequtigut siunnerfiusinnaasut, annertunerusumik eqqartuiffigineqarput. Taamaammat naammagisimaarparput naapeqatigiinneq siulleq, Jens Napaattooq oqarpoq.
Naleraq qinigaaffimmi maanna qaangiutilersumi Siumumik suleqateqanngilaq.
Naleraq: Akuerseqataaffigisagut illua-tungilersinnaavagut
Siumup isumaqatigiinniutai, soorlu aningaasalersuisarnernut missingersuutinullu tunngasut Naleqqap qinigaaffimmi qaangiutilersumi akuerseqataaffigai. Taakkuali allanngortinneqarnissaat Naleqqap ammaffigaa.
- Nutaamik eqqarsarluta inisseqqinnissarput, ujartuinissarput, uagut Naleqqaminngaanniit peqataanissarput uninngaffiginngilarput, Jens Napaattooq oqarpoq.
KNR-ip Siumumit qinigaanerpaaq, Lars-Erik Gabrielsen, isumaqatigiinniarnerit killiffii pillugit sisamanngornermi attaveqarfigigaluarpaa. Taannali oqaaseqarusunngilaq, aamma qaqugu oqaaseqarsinnaalissanerluni oqaatigiumanngilaa.
