Mette Frederiksen Trumpimut ersarissumik nalunaaruteqartoq: Nunat allat naalagaaffigisamut ilanngutitinneqarsinnaanngillat

Danskit ministeriunerat USA-p præsidentianut ersarilluinnartumik nalunaaruteqarpoq. Nunat allat naalagaaffimmut ilanngutitinneqarsinnaanngillat, taanna umiarsuarmi alapernaarsuummi Vædderenimi tusagassiortunik naatsumik katersortitsinermini oqarpoq.
Mette Frederiksenip Múte B. Egede aamma Jens-Frederik Nielsen peqatigalugit tusagassiortunik katersortitsinermi USA-p præsidentianut toqqannartumik oqaaseqarpoq. Assi © : Mads Malik Fuglsang Holm
apriilip 03-at 2025 17:18
Nutserisoq Connie Fontain

Jens-Frederik Nielsen, Múte B. Egede danskillu ministeriunerat, Mette Frederiksen ulloq naallugu imaani angalaaqatigeereerlutik Nuup kangerlua tunuliaqutaralugu tusagassiortunik katersortitsipput.

USA-llu præsidentianut oqariartuut ersarippoq:

- Nunat naalagaaffimmut ilanngutitinneqarsinnaanngillat. Aamma nunat assigiinngitsut akornanni sillimaniarneq tunngavilersuutigaluarlugu, taanna oqarpoq.

USA-lli siunissami suleqatigineqarnissaa siulittaasut arlaannaataluunnit itigartitsissutiginngilaa.

- USA ukiut 80-ingajaat suleqatigaarput, nunatsinni sakkutooqarfiata illersorneqarnerput qulakkeerpaat, niuernikkullu suleqatigiinnissaq kissaatigaarput, kisianni tuniniagaanngilagut, Múte B. Egede oqarpoq.

- Oqaloqatigiinneq soorunami aqqutissaavoq, kisianni oqaloqatigiittoqarsimannginnera qularutigineqangaatsiarpoq. Taamaammat oqaloqatigiinneq ataqqinninnermik tunngaveqartoq pingaaruteqarpoq, Jens-Frederik Nielsen oqarpoq.

USA-mut toqqaannartumik oqariartuuteqartoq

Ministeriunerup Kalaallit Nunaannut Danmarkimullu kisimi tunngannginnerarpaa, nunarsuullu tamarmi aaqqissugaaneranut aamma tunngalluni.

- Anorersuaq (USA-mit tatineqarneq aaqq.) uatsinnut ilissinnullu eqquisoq ilungersunarpoq, aatsaallu aallartilluni, taanna oqarpoq.

Mette Frederiksenilu USA-p præsidentianut, Donald Trumpimut tuluttut toqqaannartumik naggasiutigalugu oqariartuuteqarpoq, taamaalillunilu tamanna paatsoorneqassanani.

Siulittaasut pingasut imaatigut angalaarnerat Mette Frederiksenip Nuummiinneranut pilersaarutit ilagaat. Taanna USA-p præsidentiata nunatsinnik aqutsilernissaminik ersarissumik anguniagaqarnerminik piffissami kingullermi arlaleriarluni oqariartuuteqarneranik pissuteqartumik nunatsinnut tikeraarpoq.