- Attaviittutut inissippunga suleqataarusuttullu tamaasa tikilluaqquakka, taanna allappoq.Assi: KNR

Palle Jerimiassen Siumumut ilaasortaajunnaartoq

Avannaata Kommuniani qinigaaffik kingulleq borgmesteri, Palle Jerimiassen, Siumumut ilaasortaajunnaarluni nalunaarpoq.

Palle Jerimiassen kommunenut marlunngormat qinersinermi maanna parteeqatigisimasaminit, Minik Høegh-Dam-imit, 68-inik taaguunnikinnerusoq Siumumut ilaasortaajunnaarluni Facebookkimini ullaap tungaa allappoq.

AAMMA ATUARUK Avannaata Kommuniani partiit Siumumik isumaqatigiinniarnertik unitsikkallaraat

- Ippassaq ullaakkut aalajangerpunga, naatsorsuutigisimanngisaannaraluarpara tassunga killissallunga, Siumut partii qimanniarlungu.

Inuttut nammineq uannut illersorniarlunga ilaquttakkalu illersorniarlugit taamaasiorpunga, taanna ilaatigut taama allappoq.

Palle Jerimiassenili politikkimiiginnarnissaminik aalajangiusimannippoq.

- Attaviittutut inissippunga suleqataarusuttullu tamaasa tikilluaqquakka, taanna allappoq.

Siumut amerlanerussutaaruttoq

Palle Jerimiassenip Siumumit aninera Avannaata Kommunimi Siumup partiinik allanik suleqateqarani aquttuusinnaanissaanik qulakkeerinnissinnaajunnaarpoq.

AAMMA ATUARUK Palle Jerimiassen aalajangiusimavoq: Avannaata Kommuniani borgmesteriuginnarniartoq

Kommunalbestyrelsemimi ilaasortani 17-iusuni issiaviit qulingiluat Siumup pissarsiarigaluarpai maannali arfineq pingasuinnanngorput. Taamaalilluni Siumut partiinik allanik attaviittunngortumilluunniit borgmesterinngortitsinissaminut isumaqatigiinniartariaqaqqaassaaq.

Qinigaarlaaq taaguunneqarluartoq

Qinersinerup kingorna Avannaata Kommuniani borgmesterinngorniuuttoqangaatsiarpoq. Qinersinermimi kommunimi tassani taaguunneqarnerpaaq Minik Høegh-Dam borgmesterinngussalluni sisamanngormat nalunaarpoq.

AAMMA ATUARUK Minik Høegh-Dam: Avannaata Kommuniani borgmesterinngussaanga

Tamanna Palle Jerimiassenip imaaliallaannaq akuererusunngilaa. Minik Høegh-Dam-ip taama nalunaarnini partiiminit tunuliaqutserneqartoq oqarpoq, tamannali Palle Jerimiassenip tusarsimannginnerarpaa.

Qinersereernermi suleqatigiinnissamik isumaqatigiissusiornissaq siunertaralugu ataatsimiinnerni qanoq pisoqarsimanera pillugu borgmesterinngorniartut oqaluttuaat aamma assigiinngillat. Minik Høegh-Dam qinersinermi 406-inik Palle Jerimiassenilu 338-inik taaguunneqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat