Minik Høegh-Dam politikkimi nutaavoq, politikkikkullu siusinnerusumi atuuffeqarnikuusimanani.Assi: Jonas Fievé/KNR

Minik Høegh-Dam: Avannaata Kommuniani borgmesterinngussaanga

Minik Høegh-Dam Avannaata Kommuniani taaguunneqarpaavoq. Taanna maanna borgmesterinngorniarpoq.

Palle Jerimiassen (S) nunatta kommuniini avannarpasinnerpaami borgmesteriugunnaarpoq.

Taassuma borgmesteriugunnaarnissaa atuuffimmut unammillertaata Minik Høegh-Damip oqaatigaa.

Minik Høegh-Damimmi oqarnera naapertorlugu nammineq Avannaata Kommuniani borgmesterinngorpoq.

Minik Høegh-Dam aamma Siumumit qineqqusaarpoq, taannalu marlunngormat qinersisoqarnerani 406-init taaguunneqarluni.

Taannalu nunatta avannaani taaguunneqarnerpaavoq – Palle Jerimiassenilu taaguunneqarnerpaat tulliulluni 338-nit taaguunneqarpoq.

Qinersinermilu taaguunneqarnerpaap borgmesteritut atuuffimmiilernissaa Siumumi nalinginnaasuuvoq.

Minik Høegh-Dam naatsorsuutigisimaviuk taama amerlatigisunik qinerneqarnissat?

- Oqaatigiuminaappoq aatsaat sassarama. Kisianni oqaatigisinnaavara tapersersorneqarnera aallartikkama soorlu videoliornikkut tapersersorneqangaatsiarlunga malugisimavara. Kisianni soorunami tupannarpoq, tuppallernarpoq aamma nuannerlunilu qinerneqarnera taamatut.

Taava borgmesterinngulerpit?

- Tassa Siumukkut tunuliaqutigalugit borgmesterinngortinniarpaanga, aap.

Palle Jerimiassen aamma borgmesterinngorusuppoq Siumut-gruppimut oqaatigisimavaa isummeqqullugu. Taava borgmesterinngorniutilerpisi?

- Naamik, Siumuqatimma tunuliaqutserpaanga tassa borgmesterinngortinniarpaanga.

Qanga taanna aalajangerpisiuk?

- Ippassaq.

Palle Jerimiassen borgmesterinngornissat pillugu ilisimasaqarpasinngilaq. Taanna oqaloqatigigaluarpisiuk?

- Oqaloqatiginiarsaralutigu kisianni amerlanerussuteqarluta ataatsimiikkatta taamatut inerneqarpoq.

Palle Jerimiassen ataatsimiinnermut ilaava?

- Ilaallunilu ingerlagami aamma.

Avannaata Kommuniani nutaamik borgmesterertaartussanngorpoq, suna naatsorsuutigisinnaavaat ilinninngaanniit?

- Sullissilluarusuppunga, inuit tusaasariaqarpagut, inuit qanimut suleqatigisariaqarpagut.

Nutaajuvutit aatsaavissuarlu sassarlutit, akisussaaffik taama angitigisoq kivissinnaaviuk?

- Ilaqutariilluta politikkimi malinnaasimavugut meeraallutali, aamma qatanngutikka politikkeqatigaakka. Taamaammat nutaajuvunga sassartoq aap, kisianni suliassaq kivissinnaalluarpara taanna nalunngilara.

Minik Høegh-Dam politikkikkut siusinnerusumi atuuffeqarnikuusimanngilaq.

Minik Høegh-Damillu Avannaata Kommuniani borgmesterinngornissaa Palle Jerimiassenip tapersinngilaa. Taassuma ataatsimiinnerni Minik Høegh Damip peqataaffigisaani peqataasimanani KNR-imut oqaatigaa.

Avannaata Kommuniani Siumut marlunngormat qinersisoqarnerani 46,2 procentinit taaguunneqarpoq. Partiillu kommunalbestyrelsimi issiavinnit 17-init qulingiluat ingiffigisinnaavai.

Minik Høegh-Damip Qarsoq Høegh-Dam Inatsisartunut qinigassanngortittoq qatanngutigaa. Taanna aamma taaguunneqarluarpoq - 796-iniillu taaguunneqarluni. Siumumi taamaallaat Erik Jensen, Kim Kielsen aamma Aslak Vilhelm Jensen taaguunneqarnerupput.

Aki-Matilda Høegh-Damip taakku qatanngutigai. Taanna aamma Siumut sinnerlugu qinigassanngortinnermini Folketingimut qinigaanikuuvoq.

Isummersuutit