Palle Jerimiassen aalajangiusimavoq: Avannaata Kommuniani borgmesteriuginnarniartoq
Avannaata Kommuniani politikkikkut pisoqarfiuvoq.
Siumumimi taaguunneqarnerpaat marluk borgmesterinngorniuupput – taakkulu marluk tassaapput kommunip maanna borgmestererisaa, Palle Jerimiassen unammillertaalu Minik Høegh-Dam.
Minik Høegh-Dam Palle Jerimiassenimit taaguunneqarneruvoq – Siumumilu taaguunneqarnerpaap borgmesterinngortarnera ileqquuvoq.
Palle Jerimiassenili tunniutiinnanngilaq.
- Uanga paasivara innuttaasut qinersinermikkut borgmesteritut ingerlasimanera iluarisimaarlugu qinersisikka marloriaatinngortissimagaat. Taamaattumik suli borgmesteritut ingerlaqqissinnaanissara siunertaralugu massakkut Siumut-gruppia allaffiginikuuvara. Tassanilu isummerfigeqqullugu, Palle Jerimiassen KNR-imut oqarpoq.
Qinersinermit kingullermit taaguussisut marloriaatinngortut
Palle Jerimiassen marlunngormat qinersisoqarnerani 338-nit taaguunneqarpoq. Kingullermillu kommunimut qinersisoqarnerani 159-init taaguunneqarnikuulluni.
- Uku qinersinermi kisitsisit uannut tunngasut qiviassagukkit marloriaataanik siornatigut qinersinninngaaniit sinnerlugit amerleriarsimapput. Taamaattumik qinersisartut ingerlasitsisimanitsinnik tatiginninnerannik ersarissisut taarusuppakka.
AAMMA ATUARUK Minik Høegh-Dam: Avannaata Kommuniani borgmesterinngussaanga
Siumumi qinigaanerpaaq borgmesterinngortartoq taanna ilisimavarput. Borgmesterinngunngitsooqqinnerimmi qanoq tiguviuk?
- Taamaattumik suli ataatsimiittoqanngilaq aammalu suli kommunalbestyrelsi ataatsimiinnikuunngilaq. Kommunalbestyrelsenip aalajangerumaarpaa kina katersuuffigissanerlugu. Aamma tassani suli ingerlaqqissinnaanissara piareersimaffigivara.
Qaqugu taava ataatsimiissavisi?
- Suli aaliangerneqanngilaq qaqugu kommunalbestyrelsi nutaaq ataatsimiissanersut. Immaqa una qaammat naalernerani ingerlattussaassooq. Taamanikkussamut kommunalbestyrelsenip aaliangerumaarpaat amerlanerussuteqartut kina borgmesteriussanerluni. Aamma taanna ataqqissavara, Palle Jerimiassen oqarpoq.
Ataatsimeeqataariarluni ingerlasoq
Minik Høegh-Dam marlunngormat qinersisoqarmat 406-init taaguunneqarpoq.
Taassuma Siumut gruppiata borgmesterinngortikkusukkaani KNR-imut oqaatigaa.
Palle Jerimiassen borgmesterinngornissat pillugu ilisimasaqarpasinngilaq. Taanna oqaloqatigigaluarpisiuk?
- Oqaloqatiginiarsaralutigu kisianni amerlanerussuteqarluta ataatsimiikkatta taamatut inerneqarpoq, Minik Høegh-Dam KNR-imut oqarpoq.
Palle Jerimiassen ataatsimiinnermut ilaava?
- Ilaallunilu ingerlagami aamma.
Palle Jerimiassen Avannaata Kommuniani 2017-imili borgmesteriulerpoq.
