Borgmesterinngortitsinissamut isumaqatigiinniarnerit unitsinneqarallartut, Inuit Ataqatigiinneersup Bendt B. Kristiansen partiit sisamat sinnerlugit oqarpoq.Assi: KNR

Avannaata Kommuniani partiit Siumumik isumaqatigiinniarnertik unitsikkallaraat

Isumaqatigiinniarnerit borgmesterinngortitsinermut qitisut Siumup aaqqiagiinnginnermik aaqqiissuteqarnissaata tungaanut unitsinneqartut, Inuit Ataqatigiinneersoq Bendt B. Kristiansen oqarpoq.

- Siumup iluani aaqqiagiinnginneq annertooq, inuiaqatigiinnut takutitaat, aallaavigalutigu isumaqatigiinniarnernik sammiveqartunik partiit sisamaalluta Siumup ilumini ajornartorsiutigisami aaqqereernissaata tungaanut unitsitsigallarpugut.

- Takusinnaannginnatsigut tusagassiuutitigut taama ilusilimmik saqqummeqattaarnerat qanoq inerneqarumaarnersoq, aammalu kina siuttussatut isumaqatigiinniarfigissallugu takusinnaannginnatsigu, Inuit Ataqatigiinneersoq Bendt B. Kristiansen oqarpoq.

- Aammalu ilaatigut malussarfipput unaavoq, isumaqatigiissummik sukkasuumik ullut tulliuttuni sanapallattoqarusuttutut partii ataasiinnaanngitsoq misigivugut, Bendt B. Kristiansen oqarpoq, nangillunilu.

- Isumaqarpugullu aamma sukkasuumik isumaqatigiissusiorniarsaripallanneq, partiimi avissaartuunnermik taama annertutigisumik peqarluni naapertuutinngitsoq. Taamaattumik partiit sisamaasugut isumaqatigiinniarnerit sukumiisumik aallartisarsinnaanissaannut piareeqqanngilagut.

Taaguunneqarnerpaaq borgmesteriussaaq - imaluunniit?

Minik Høegh-Dam Palle Jerimiassenimit amerlanernit taaguunneqarpoq, taaguunneqarnerlu borgmesterinngortartoq Siumumi ileqquuvoq.

Palle Jerimiassenili tunniutiinnanngilaq. Minik Høegh-Dam borgmesterinngortussanngorluni ippassaq nalunaarpoq, maannali borgmesteri borgmestiuunnarnissani Siumup gruppianut isummeqqullugu aamma nalunaarpoq.

Isumaqatigiinniartoqalissappallu taakku aaqqeqqaartariaqartut, Bendt B. Kristiansen oqarpoq.

AAMMA ATUARUK Avannaata Kommuniani borgmesterissarsiorneq pissanganartorsiutaasoq

- Inuiaqatigiinni maluginiarneqarpoq, Siumut amerlanerussuteqarluinnartoq taamaalillunilu nammineerluni borgmesterissaminik innersuussisussaq. Taanna partiip amerlanerussuteqartup piginnaatitaaffigaa. Uagut illuatungiliuttuni ataqqissavarput, susinnaanngilarpullu.

- Taamaattumik taamatut inissisimagaluarluni paaseqatigiissinnaanani inissikkaanni taava arlaatigut ajornartorsiuteqartoqangaatsiarpoq, Bendt B. Kristiansen oqarpoq.

Avannaata Kommunia sinnerlugu Siumup siulersuisuunerini ilaasortaq, Sakio Fleischer, attaveqarfigaa, taannali suliami oqaaseqartartussatut toqqarneqarsimasumut Bernard Olsenimut innersuussivoq.

Taanna ullaaq manna attaveqarfigisinnaanngilarput.

AAMMA ATUARUK Palle Jerimiassen aalajangiusimavoq: Avannaata Kommuniani borgmesteriuginnarniartoq

Palle Jerimiassenip unammillertiminut tapersiissaguni allagaatinik takusaqaqqaarusulluni oqaatigereerpaa.

KNR-ip Bendt B. Kristiansenillu allagaatit suunersut ilisimanngilaat.

Isummersuutit