Paasitinneqarsinnaatitaaneq pillugu inatsit danskit partiivisa allanngortikkusukkaat
Pisortat ingerlatsinerat pillugu paasitinneqarsinnaatitaaneq pillugu inatsisip danskit nunatsinni oqartussaasuinut atuuttussanngortinnissaanik siunnersuutip sapaatit-akunnerata siuliani unitsinneqarnerata kingorna tamanna tusarliunneqarpoq.
Danmarkimi pisortat ingerlatsinerat pillugu paasitinneqarsinnaatitaaneq pillugu inatsisip allanngortinneqarsinnaanera isumaliutigissallugu danskit naalakkersuisuisa piareersimaffigaat.
Inatsisip, ilaatigut Danmarkimi tusagassiuutinit sakkortuumik isornartorsiorneqarluni Danmarkimi atortussanngortinneqarneranit ukiut pingasut qaangiunnerini taama pisoqarpoq.
De Radikalet, SF-ip De Konservativellu piumasaqaateqarnerisigut Venstrep naalakkersuisuutitai inatsisip isumaqatigiinniutigeqqinnissaanut qaaqqusipput. Partiit 2013-imi inatsimmut akuerseqataagaluarput.
- Ataatsimoorluta inatsisip allanngortinnissaanik suliaqartussanngornerput nuannaarutigeqaara, De Koservativet siulittaasuat Søren Pape, aviisimut ullormut saqqummersartumut Politikenimut taama oqarpoq.
Aamma atuaruk Paasitinneqarsinnaatitaaneq pillugu inatsit Politikerit arajutsisut
Ministerinut tunngatillugu aalajangersagaq pineqartoq
Ministerinut tunngatillugu paragrafit isornartorsiorneqarnersaapput.
Ministerimmi akornanni aamma aqutsisoqarfiit ministereqarfiillu akornanni allagaatinik takunnissinnaanermut periarfissat paragrafini taakkunani annikillisinneqarput. Ministerit ilaatigut tamat paasitinneqarsinnaatitaaffiginngisaannik suliani siunnersorneqarnissaminnut 'suliami akornusersorneqannginnissaminnik' pisariaqartitsinerat tunngavilersuutigineqarpoq.
De Konservativet paragraf 22-p, 24-p 27-llu allanngortinneqarnissaat piumasaqaatigaat.
- Danskit naalakkersuisui isumaqatigiinniarnissamut qaaqqusimmata naatsorsuutigaara ajornartorsiutit ersersitatta aaqqiissuteqarfiginissaannut pimoorussilluni soqutiginnittoqartoq, Søren Pape taama oqarpoq.
Inatsimmik 2013-imi akuersissuteqartut partiit tallimaasut - Socialdemokratiet, Venstre, SF, De Radikale aamma De Konservative - inatsit allanngortinneqassappat isumaqatigiittariaqassapput.
De Konservativelli, SF-ip Radikale Venstrellu inatsit aappaagu juunip ulluisa tallimaat, Inatsisitaarfik, nallertinnagu isumaqatigiinniutigeqqinneqarsimanngippat inatsisip isumaqatigiissutigineqarnerata atorunnaarsinnissaa sioorasaarutigaat.
Aamma atuaruk Kielsenip inatsisissatut siunnersuut tunuartikkaa
Inatsit pineqartoq Nunatsinni unikkallarneqartoq
Danskit inatsisinik atortitsinermut ministerip Søren Pindip inatsisip sutigut allanngortinneqarnissaanut piareersimanerluni erseqqissumik oqaatigiumanngilaa. Isumaqatigiinniarnerilli "ingerlalluartut" ilisimatitsissutigaa.
Danmarkimi pisortat ingerlatsinerat pillugu paasitinneqarsinnaatitaaneq pillugu inatsisip danskit oqartussaasuinut nunatsinniittunut atuuttussanngortinneqarnissaa sapaatit-akunnerata siuliani unitsinneqarpoq.
Siunnersuutip Inatsisartuni oqaluuserineqarnissaa sioqqullugu Namminersorlutik Oqartussanit Nunatsinni tusarniaassutigineqarsimannginnerata isornartorsiorneqarnera pissutigalugu taama pisoqarpoq.
Siunnersuut tusarniaasoqarnissaata tungaanut peerneqarallarpoq.
Aamma atuaruk Eqqartuussissuserisut: Pisortat ingerlatsinerat pillugu paasitinneqarsinnaatitaaneq pillugu inatsisissaq kinguartilli
Aamma atuaruk Paasitinneqarsinnaatitaaneq pillugu inatsisip atortussanngortinneqarnissaa IA-p tapersernianngikkaa
Aamma atuaruk Danskit inatsisaata atuutilersinneqarnissaa nunatsinni tusarniaassutigineqanngitsoq
