Assi: Nils Baum/Bureau for Inatsisartut

Paasitinneqarsinnaatitaaneq pillugu inatsit Politikerit arajutsisut

Danmarkimi pisortat ingerlatsinerat pillugu paasitinneqarsinnaatitaaneq pillugu inatsit Inatsisartuni siullermeerneqarmat Nunatsinni tusarniaassutigineqarsimannginnera Inatsisartuni politikerinit oqaaseqarfigineqanngilaq. Demokraatit arajutsisimanertik nassuerutigaat.

Danmarkimi pisortat ingerlatsinerat pillugu paasitinneqarsinnaatitaaneq pillugu inatsisip danskit oqartussaasuinut Nunatsinniittunut atuuttussanngortinneqarnissaanik siunnersuut Naalakkersuisut siulittaasuata Kim Kielsenip ataasinngormat kinguartippaa.

Inatsisissatut siunnersuutip Nunatsinni tusarniaassutigineqarsimannginneranik KNR-ip pisortaanerata Nunatsinnilu eqqartuussissuserisut peqatigiiffiata isornartorsiuinerisa kingorna taama pisoqarpoq.

Inatsisissatulli siunnersuut Inatsisartuni sapaatit-akunnerata siuliani siullermeerneqarmat Nunatsinni tamanut ammasumik tusarniaassutigineqarsimannginnera partiinit oqaaseqarfigineqanngilaq.

Aamma atuaruk Kielsenip inatsisissatut siunnersuut tunuartikkaa

Demokraatit Inatsisartuni ilaasortaatitaasa siulittaasuata Michael Rosingip arajutsisimanini nassuerutigaa.

- Piareersaataasumik suliaqarninni uanga kukkuneraara. Tassuuna pikkorliorsimavunga, tamannalu ajuusaarutigaara, KNR-imut taama oqarpoq.

Rosing naapertorlugu, assersuutigalugu Nunatsinni tusarniaanermit akissuteqartoqarsimannginnera imaluunniit suliamut tunngatillugu Nunatsinni tusarniaavigisassat allattorsimaffiannik peqannginnera Demokraatit paasisimasariaqaraluarpaat.

- Tamakkumi inatsisissatut siunnersuummut atatillugu atortussani atuarneqarsinnaasarput. Tamatuma sianigineqarsimannginnera tungitsinnit kukkuneruvoq, Michael Rosing taama oqarpoq.

IA: Sammisarput allaavoq

Partiit oqaaseqartartuisa arlaannaataluunniit siunnersuutip siullermeerneqarnerani oqaaseqarnerminni Danmarkimi pisortat ingerlatsinerat pillugu paasitinneqarsinnaatitaaneq pillugu inatsisip Nunatsinni tusarniaassutigineqarsimannginnera eqqaanngilaat. Siunnersuut danskit inatsisinik atortitsinermut ministereqarfiannit siunnersuutaavoq.

Aamma atuaruk Eqqartuussissuserisut: Pisortat ingerlatsinerat pillugu paasitinneqarsinnaatitaaneq pillugu inatsisissaq kinguartilli

Siunnersuutip siullermeerneqarneranit Inatsisartoqarfiup imaqarniliaa naapertorlugu, Inuit Ataqatigiit kisiartaallutik siunnersuutip itigartitsissutigineqarnissaanik siunnersuuteqartuupput. Tamannalu pivoq naak partiit allat, ilaatigut Demokraatit, inatsisip imarisaanut tunngaviatigut isumaqataanngikkaluartut.

Inuit Ataqatigiilli siulittaasuata Sara Olsvigip tusarniaavigineqartut allattorsimaffianni takisuupilussuarmi Danmarkimeersut kisiisa allaqqanerat maluginiarsimavaa.

- Tusarniaavigineqartut allattorsimaffianni, siunnersuummut ilanngussami, Danmarkimeersuinnarnik tusarniaasoqarsimanera tupaallaatigisupilussuuara, Sara Olsvig oqarpoq.

Taamaakkaluartorli taassuma Inuit Ataqatigiillu Inatsisartuni ilaasortaatitaasa allat inatsisip oqaluuserineqarnerani tusarniaasoqarsimannginnera oqaaseqarfiginngilaat.

- Tassami… Qanoq oqassaanga… Inatsisip imarisaa immikkut sammivarput.

Aamma atuaruk Paasitinneqarsinnaatitaaneq pillugu inatsisip atortussanngortinneqarnissaa IA-p tapersernianngikkaa

Olsvigillu tamatumunnga tunngavilersuutigaa Kim Kielsenip ullormi tassanerpiaq akunnermi apeqqarissaarfigineqarnerani Nunatsinni tusarniaasoqarsimannginnera partiimit apeqqutigineqarsimanera. Inatsisilli oqaluuserineqarnerani partii siunnersuummut isumaqataanersoq isumaqataannginnersorluunniit pingaarnertut sammineqartoq.

- Tamanna soorunami oqaaseqarfigisimasariaqaraluarparput. Nunatsinni tamanut ammasumik tusarniaasoqarsimannginnera naammaginanngilluinnarpoq, soorlu apersuinerup matuma aallartinnera aamma taama oqartunga, Sara Olsvig oqarpoq.

Naalakkersuisut siulittaasuata nalunaarutigaa Danmarkimi pisortat ingerlatsinerat pillugu paasitinneqarsinnaatitaaneq pillugu inatsisissatut siunnersuut Nunatsinni 'naammaginartumik tusarniaasoqarnissaata" tungaanut kinguartinneqarallartoq.

Aamma atuaruk Danskit inatsisaata atuutilersinneqarnissaa nunatsinni tusarniaassutigineqanngitsoq

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat