Eqqartuussissuserisut: Pisortat ingerlatsinerat pillugu paasitinneqarsinnaatitaaneq pillugu inatsisissaq kinguartilli

Kalaallit Nunaanni inatsisilerituut peqatigiiffiat taama isumaqarpoq.

Taamaakkaluartoq Inatsisartut siunnersuut sapaatip akunnerani matumani suliaraat.

Inatsit ministerit pappialaataannik paasinnissinnaatitaanermut sukaterisimaneq assut isornartorsiorneqarsimavoq.

Inatsisartunili suliarineqarnera pivoq suliaq pillugu Kalaallit Nunaanni tamanut ammasumik tusarniaasoqarsimatinnagu.

Aamma atuaruk Danskit inatsisaata atuutilersinneqarnissaa nunatsinni tusarniaassutigineqanngitsoq

Taarsiullugu inatsisinut atuutitsinermut ministereqarfiup taamaallaat danskit oqartussaasui, tusagassiuutaat suliniaqatigiiffiilu siunnersuut pillugu tusarniaaffigisimavaat.

Tamanna naammanngilluinnartoq Kalaallit Nunaanni inatsisilerituut peqatigiiffianneersoq Anita S. Sørensen oqarpoq.

- Isumaqarpugut tamanna naleqqutinngilluinnartoq. Suliat Kalaallit Nunaannut attuumassutillit pillugit tusarniarneqartuartaraluarpugut. Aamma danskilluunniit oqartussaasuisa akisussaaffigigaluarpatigit.

Naalakkersuisut siulittaasuata naalakkersuisoqarfia naapertorlugu Danmarkimeersuummat inatsisinik atuutsitsinermut ministereqarfiup tamanna suliassarivaa.

Aamma Kim Kielsenip naalakkersuisoqarfiata tassaagaluarpalluunniit Inatsisartuni oqaluuserisassanngortitsisoq.

Inatsisinik atuutsitinermut ministereqarfimmiit oqaaseqartitsisinnaasimanngilagut.

Kalaallit Nunaanni inatsisilerituut peqatigiiffia aalajangiissagaluaruni suliap Kalaallit Nunaanni suliarineqarnera unitsikkallartariaqarpoq.

- Isumaqarpunga inatsisissatut siunnersuutip suliarineqarnissaa kinguartittariaqartoq. kalaallit attuumassutillit tusarniaavigineqarniassammata, taavalu upernaamut kinguartinnissaa akueralugu, inatsisileritooq oqarpoq.

- Inartsisitigut isumannaatsuunissaq eqqarsaatigalugu tusarniaasoqarsimannginnera aamma ajornartorsiutaavoq.

Aamma atuaruk Pisortat ingerlatsinerat pillugu paasitinneqarsinnaatitaaneq ajornarnerulissaaq