Danskit inatsisaata atuutilersinneqarnissaa nunatsinni tusarniaassutigineqanngitsoq
Namminersorlutik Oqartussat Tusarniaanermi nalunaarsuiffianni tamanna takuneqarsinnaavoq, aamma Naalakkersuisut siulittaasuata naalakkersuisoqarfianit tamanna uppernarsarneqarpoq.
Namminersorlutik Oqartussat aamma danskit inatsisinik atortitsinermut ministereqarfiat inatsisissatut siunnersuut pillugu Nunatsinni tamanut ammasumik tusarniaasimanngillat.
Taamaalillutik assersuutigalugit KNR, tusagassiorfik Sermitsiaq.AG, Nunatsinni Eqqartuussissuserisut attuumassuteqartullu allat inatsit qanoq isumaqarfiginerlugu oqaaseqaateqarnissaminnut periarfissinneqanngillat. Inatsimmi pineqartumi danskit nunatsinni oqartussaasuisa ingerlatsinerat pillugu paasitinneqarsinnaatitaanermut killiliussat aalajangersarneqarput.
Aamma atuaruk Pisortat ingerlatsinerat pillugu paasitinneqarsinnaatitaaneq ajornarnerulissaaq
Pisortat ingerlatsinerat pillugu paasitinneqarsinnaatitaaneq pillugu inatsit Danmarkimi isornartorsiorneqangaatsiarsimavoq, tamatumani ministerikkoortumik allagaatit isertuunniarneqarmata.
Tusarniaasoqarsimanngikkaluartorlu inatsisissatut siunnersuut Inatsisartuni sapaatit-akunneranni uani siullermeerneqarpoq.
Danmarkimi pisortat ingerlatsinerat pillugu paasitinneqarsinnaatitaaneq pillugu inatsisip 2013-imeersup danskit Nunatsinni Savalimmiunilu oqartussaasuinut atuutsinneqalernissaanik danskit inatsisinik atortitsinermut ministereqarfiat siunnersuuteqartuuvoq. Nunatsinni tusarniaasoqarsimannginneranut suna pissutaanersoq ministereqarfiup maanna misissuleruttorpaa.
