Paasisitsiniaaneq: Atoqatigiittarneq ajunngitsuuvoq
Paasisitsiniaanermi nappaatipilunnik ersisaarinnginnissaq pingaartinneqarpoq, taamatullu inuusuttuaqqanik paasisitsiniaasussat tassaassallutik inuusuttut.
- Paasisitsiniaanerni siornatigut pisartuni napparsimmaveqarfinni utoqqaanerusut paasisitsiniaasarput. Taakku inuusuttunut ilitsersuinerinnaanerusumik paasisitsiniaasarlutik, soorlu oqarlutik 'imaaliussaasi, imaaliorussi ulorianarpoq'. Uangulli maanna oqariartuutiginiarparput atoqatigiinneq ajunngitsuusoq, kisiannili imminut paarisariaqartut, Lisa Ivalu Lind taama oqarpoq.
Taanna peqqissaasunngorniarluni ukiut sisamassaanik maanna ilinniartuuvoq. Ilinniagaqarnermilu saniatigut nammineq piumassutsini aallaavigalugu, Nuummi meeqqat atuarfiini atoqatigiittarneq uloriananngitsoq paasisitsiniutigalugu. Suliniut, SexInuk, inuusuttuinnarnit taanna suliarineqartoq.
Lisa Ivalu Lind oqarpoq, siornatigut paasisitsiniaasarnerit ersisaarutaanerusut iluaqutaasimanngitsut.
Tamannalu Nunatsinni Nakorsaaneqarfimmit isumaqatigineqarpoq.
- Ersisaarinerinnarmik paasisitsiniaasarnerit allanngortitsivallaarsimanngitsut takuneqarsinnaavoq. Taamaattumik inuusuttut inuusuuttoqatiminnut paasisitsiniaanissaat maanna aallartinneqartariaqarpoq imminut paarinissamik taanna oqariartuuteqassalluni.
Nunatta Nakorsaaneqarfiani peqqissaanermik ilinniagaqartunut siunnersorti, Charlotte Lange oqarpoq.
SexInuk
Nakorsaaneqarfiullu paasisitsiniaaneq SexInuk, inuusuttunit piumassutsiminnillu suliaqartunit ingerlanneqartoq tapersersorlugu.
Meeqqat atuarfiini paasisitsiniaasarnerit, Lisa Ivalu Lindip maannamut ilisimasaqarfigillualereerpai. Soorlu atoqatigiittarnermut tunngasut meeqqanit inuusuttuaqqanillu aallaqqaammut paqumigineqartaraluartut oqarluni.
Aamma atuaruk Syfilisi Nunatsinni atugaanerulerpoq
Tamannalu qaangerniarlugu meeqqat inuusuttuaqqallu aallaqqaammut pinnguaqatigineqartarput takutinniarlugu namminneq aamma inuusuttuugamik.
- Inuusuttut inuusuttunik atuartitsigaagata, inuusuttut oqallinnissaminnut apersuinissaminnullu tunuarsimannginnerusarput aamma malunnartumik misigisimasarput paasineqarlutik, tamannalu assut iluaqutaavoq.
Paasisitsiniaaneq siammarterneqarluassaaq
Lisa Ivalu Lind aamma oqarpoq paasisitsiniaaneq, SexInuk filmiliaralugu paasisitsiniaasoqassasoq taamatullu quppersakkat bussinilu allagartarsualiornikkut tamannna paasisitsiniarneqassalluni kikkullu tamarmik paasisinnaasaannik oqaasertaqassalluni.
Aamma atuaruk Naartusut marluugaangata aappaa naartuersittarpoq
Paasisitsiniaaneq qulequtserneqassaaq Immunut paarigit - usuup puua atortaruk.
- Neriuutigaarput taamaasilluta angusinnaassagipput, inuusuttut ilaqartarnerminni imminnut paarinerunissaat soorlu usuup puua atorlugu.
SexInuk pillugu paasisitsiniaanermi suleqataasoq, Lisa Ivalu Lind taama oqarpoq.
Inuusuttut akornanni atoqatigiinnerup paasisitsiniutigineqarnissaanut atatillugu, Nunatta Nakorsaaneqarfiata qanittukkut nalunaarutigaa, Ilulissani inuusuttut akornanni HIV-mik tunillatsitoqarsimasoq.
Tamassumalu siaruaassinnaanera ernumagineqarpoq, tassa Nunatsinni inuit amerlanerit usuup puuanik atortoqaratik ilaqartartut amerlavallaaneri qangali ilisimaneqarmat. Taamaattoqarnerani nappaatipiluit tuniluuttut soorlu syfilis, gonorre amma klamydia atugaasorujussuullutik. Tamassumalu saniatigut naartuersittarnerit aamma amerlasuut ilisimaneqarluni.
Aamma atuaruk HIV-mik tunillatsissimasut inuusuttuummata nakorsaanerup ernummatigaa
Aamma atuaruk Hiv aidsilu eqqartussallugit suli paqumigineqartarput
HIV-mik tunillaassuineq inuiaqatigiit ilaannaanni qujanartumik tuniluuppoq iluamillu annertuumik siaruaassorneqarani.
Siaruaappalli tamanna ernumanarluinnartutut nakorsaaneqarfimmit isigineqarpoq.
- Siaruaakkuni tamanna sukkasuupilussuarmik pisinnaalluarpoq.
Nunatta Nakorsaaneqarfiani atorfilik, Charlotte Lange oqarpoq, HIV-llu siaruaatinnginnissaa ajornanngitsuaqqamik pinngitsoortinneqarsinnaasoq oqarluni.
- Tassa ilisarisimanngisamik atoqateqarnermi, usuup puaanik atortoqarnerup tamanna pinngitsoortissinnaavaa, allamik naamik.
Nunatta Nakorsaaneqarfiani peqqissaanermik ilinniagaqartunut siunnersorti, Charlotte Lange oqarpoq.
